U State General Secretary ka BJP, u Wankitbok Pohshna da dawa u wow kyrriah noh ya ka DC ka East Khasi Hills District nei wym chngaaiñ de ki chnong ki thaw hadien ki kaam pynyap ya ki khynnah iwa da jia ha kani ka thaaiñ ha uni u bnai.
Hawa yaklam wa kiwa thoh khubor, u Wankitbok da ong u wa da yoo phylla wa wot hadien i chah pynyap ka Insaphira Mawnai ym em leh iyi iyi da ki bor District yow wanrah yei chngaaiñ khamtam leh hadien wa chah pynyap sa u Ksanborlang Kharmudai uwa dang 7 snem i rta wei ym pu em chem sabut iyi iyi hadooh kattæ.
Da ong u leh wa ka khlieh District ym em chimkhia ko wow khut yalang næ wow phah pynjoor yei lai Patrolling heipor miet ha ki thaw wa rap em cha kdong wa jia ki kaam sih khmatam heipor chiteiñ synyaaw.
Chooh chooh da ong wa em boon ki kdong ki chmiang ha sor kiwa jia boon ki kaam wa yoomaa, ki kaam awria deiwa e nongmuna wa ka luti na skur BK Bajoria hadooh ha PGT College ha Laitumkhrah wa da man ko kam ka thaw chong dih mar ya doom ka sngi.
Wei ka Laitumkhrah Police Point da man ko kam ka Khyndailad wa-ar khmatam ha ki sngi Thohdieñ hadooh ka sngi Bibar neidaw wym bna ki bor pynlai District hadooh wa da chim kabu ki bru wym man ya kini ki thaw dei wym tieñ de ya ka aiñ.
Kamtæ da sñiaw toh wa ka sorkar u chimkhia ko wow kyrriah noh ya ka DC ka East Khasi Hills deiwa thung da kiwa ye u kreh neibynta i chongsuk chong chngaaiñ.
Da kdaw leh wa kammon kiwi ki heh District kam ha Ri-Bhoi kiwa krehkaam ki wow kdoh u khoom ya ki kaam sih nadooh wow kynreh ya ki kari heipor miet wei da ye leh wow kem smat ya uwa pynyap wei slaitbor ya ka khynnah wa dang 13 snem.
Hajrong ini waroh da ong wa kam ka seiñ saiñ pyrthai kawa em i kitkhlieh da kypaad joor ya ka sorkar jylla wow nang pynkhlan chooh chooh ya ki bor pulit ha ka jylla khnang yow ye u pyndooh pyndam yei jia wa sñiawsih hapoh ka jylla.
Discussion about this post