15 49.0138 8.38624 1 0 4000 1 https://wyrta.com 300 0

Ka lehkmen wow wanrah ya i yatylli ha East Jaiñtia Hills

0 Comments

Khliehriat : Ka District Basin Development Unit, East Jaiñtia Hills District chirup i krehlang wa ka Office yong u Divisional Soil & Water Conservation Officer wa ka District Sport Officer, East Jaiñtia Hills District da pynman ko ya ka Gramoday Celebration ha ka 19 uni u bnai ha Diengshynrum Football Stadium, East Jaiñtia Hills District.

I yumut yong kani ka Gramoday toh yow wanrah ya ka sñiaw yajan, sñiaw maya kam chi payu wa i yatylli ha ka chnong ka thaw, ka District wa ka jylla hi waroh kawi dei wa pynman ya kiwa boon ki yaleh ke sports wa kiwi kiwi tawan de ki yalehke.

Ha kani ka sngi da em leh ka yalehke football semi-final, wa ka final yong ka Inter-Watershed Football Tournament. Ya ka yakhun final da pynman ha pyrdi ka Jalaphet wa ka Sutnga heiwa ka Jalaphet da yoh ko ya i naam jop deiwa pynrem ko ya ka Sutnga da 3 -2  lyngba ka yachut Tie-breaker.

Chwa u sdang ka yalehke final, da em ka yalang kawa chong kun heiwa u Justin Dkhar, MLA Khliehriat Constituency da man u kam u kongsan chirup i emlang u Deputy Commissioner, East Jaiñtia Hills, u M. Lhuid kam u symbood kongsan ki sahep wa kiwa kreh sorkar waphær waphær napoh ka District, ki waheh chnong wa ki paidbah wa boon.

Ya ka yalang da pyllai da ka D.V. Lyngdoh, MCS, EAC, & Nodal Officer District Basin Development Unit, East Jaiñtia Hills District. Ya ki ktien pdiang sñiawbha da yoh na u E. Laloo, Divisional Soil & Water Conservation Officer. Da yoh leh yei klam na u Sanborlang Raliang, Programme Associate, District Basin Development Unit, East Jaiñtia Hills District hajrong ka Integrated Basin Development Livelihood Promotion Programme.

U Deputy Commissioner hei klam yong oo, da ong u wa i thmu yong kani Gramoday toh yow wanrah yei sñiaw chi payu i sñiaw yajooh sñiaw ya jan para bru ha chnong ha thaw wa ha ka District hi waroh kawi. Da ong chooh chooh u toh u pynthymme ya i rukom im yong i ha chnong ha thaw khamtam kiwa na nongkyndong; deiwa pynchlur u yow man ki kiwa yoh yei kreh yei khih ha chnong ha thaw, wei ymtoh u beh i u im cha sor neibhah yoh i yei baam i dih na nongkyndong.

U kongsan hei klam yong oo da e khublei u ya ka Basin Development Unit, ka office yong ka Soil & Water Conservation wa ka office yong ka District Sport Officer kiwa da ye u pynman ya kani ka leh pynemwarom. Da batai u leh ya i yumut yong ka Basin Development Unit deiwa riñdur u ya ka kam ka dabor ha kawa i roi i par u theh u chlai i na ka. Hei yatoh wa ka football da ong u wa ka lehke football wanrah ko ya ka mynsien wow man iwi, chi payu wa i ya maap kylliang iwi ya iwi. Heijooh i por da kyntu u ya ki paidbah ka thaiñ wow man ki kiwa em ka mynsien ya krehlang, ka ya tylli ha ki liang waroh nei bynta i roi i por ka chnong ka thaw wa ka district waroh kawi.

Da pynphooh pynphieñ ya kani ka sngi da i Chaad Pliang Sahep na ka Seiñ Manbei, ki chaad tynre na ka Thuruk Cultural Troupe wa ka Chaad Sukra na ka Khliehriat Traditional Dance Group. Da em leh ka pynyoo rong wei dai ya ki mar (exhibition cum sale) kam ki umngap, sohkhontara, dakharang, ki syntu, strawberry, sa-iñ, chyrmit, tpuwaseiññ wa dohjem, jadoh, mura, ki sula ki that wa sooh da soor hi da ki wa wan pynyoo rong wa kiwi kiwi mar wa pynmih da ki warep.

Da pynkut ya kani ka lehkmen da i yakop pynhær diñkum heiwa u Jeronimus Nongtdu na Dkhiah East da yoh u ya i naam wa nyngkong katwa u Emil Phawa na Iongkaluh da yoh u ya i naam wa ar.

Advertisement ad1

0 Comments

Leave a Reply