Jowai : Ka Kñia Pyrthat ka wow sdang nadooh ka 29 tarik u uni u bnai hadooh ka 9 tarik u bnai wa bood toh ka pynkhreh wa khaddooh chwa u hiar li yoo u Trekirot wa ki sangia saret cha sla pyrthai yow li pait li yoo ki ya kiwa em ha sla khyndaw pyrthai.
Ya kani ka Kñia Pyrthat u sdang da ka Dih Soopen ha Iung Langdoh heipor 7 waje i step ha ka 29 tarik pynbood won sa i lithooh Sniang Pyrthat u Sangot Paswet wa u Harna.
Da pteiñ ya kani ka lehniam won ha ka 2 tarik u bnai wa bood deiwa mih ki Wasan yow lichim Sniang Pyrthat ha Iaw Iongpiah heipor 11 waje i step. Heipor 1 waje i sngi won u Sangot Paswet u lai thooh tiar knia u katwa ki Wasan u lai li e wyrta ki cha ki Phra Kur Phra Kmai yow baam Tyngkong.
Ha kajooh ka sngi heipor 6 waje i jan miet ki Wasan u lithooh ki ya u Dolloi yow li yoo Sniang Pyrthat, kamjooh u e ya i pyrnah wow ya Ngooh Blai.
Daw pynbood won sa u Harna u khreh u yow e ja ya u Sniang Pyrthat. Ki Phra Kur Phra Kmai u sdang ki u Baam Tyngkong nei bynta u Syiem Pyrthat wei hadien ini daw em won sa ka Yutang na u Dolloi.
Dang 4 waje i step ka sngi wa bood won ka Langdoh wow Sangot Paswet u sdang ki u chet Tpu wei wym hoi u psiah kiwi tawan ha Rakut.
Heipor 5 waje i step u poi ki Waheh Wasian ka Seiñraij, ki Phra Kur Phra Kmai u bichaar ki ya ki dak ki chin ha u Tpu Ka Langdoh, u Tpu u Dolloi wa u Tpu ka Seiñraij. Hadien ini u khreh mih Knia Pyrthat cha Loom Mookhia chirup wa ki soo Langdoh.
Ha madan baam Kñia Pyrthat, hadien wa da dep baam, dep song, u yoh ya ka yutang na u Dolloi, wa u Kongwasan (Langdoh Chyrmang).
Manda uiñ biang cha yung ka Langdoh ki wasan u lai saam ki ya ki sla bhah cha waroh ki Phra Kur Phram Kmai wa ki wa yoh bynta.
Ha ka 9 tarik won heipor 7 waje i step u em i Dih Soopen ha yung Langdoh pynbood sa i lai li pait thaw lehniam waroh heiwa emlang u Dolloi, u Pator, u Langdoh wa ki Waheh Wa Sian ka Seiñraij.
Discussion about this post