U Prestone Tynsong uwa man u Symbood Montri Rangbah ka jylla da ong u wa ka sorkar hadooh ynne ym em thmu ko wow pynkrehkaam ya i khangsbak namo ka Lockdown, tangwa lada i yabi ya u khñiang ku i chadooh 40-50% itæ daw booh i hei maa wei du i khangsbak donhi ka luti. Da ong u wa ka sorkar katni da yaleh ko wow pynkhor bha khamtam ya kiwa na baar jylla wow phah pait bniah (Test), heiwa du ki wym em u chah ktah wa kiwa em ya ka Negative Report ka RTPCR wa hapoh 72 kynta u ye ki wow psiah.
I em kiwa yabi ya u khñiang COVID-19 hapoh ka jylla da ku smat biang i ha kini ki kajiak sngi wa dadep, heiwa kiwa da chah ktah hadooh ynne ka sngi da em ki 1318 ngut, wei du ynne ka sngi da em hadooh 275 ngut kiwa dang yoh thymme ha uni u khñiang.
Hawa kylli, u Prestone da ong u wa ka sorkar neibynta wow yada na i poor uni u khñiang da pynemkaam lut ko ya kiwa kreh sorkar na ki chnat wow lai pynche paidbah yei emkaam i tika. Da ong u wa ha ri India waroh kawi hanlada i yabi u COVID-19 da ku bha i, tangwa kiwa chitom wei kiwa yap duna ki neidaw wa chim tika.
U Prestone da ong u leh wa ka sorkar da chim ko leh ya kawi na ki laad yada wei katæ toh wow pynkrehkaam ya ki kyndon wa ki paidbah hap bood ki khamtam ya ki bru kiwa wan na baar jylla heiwa da ong u leh wa i em kiwa chim tika hapoh jylla da ku i ha kini ki kajiak tayaw wa dadep.
