15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Ka Lockdown ye ko wow pynsangeh yei poor ka khlam wei yei im wa man-ka-sngi: Conrad

Advertisement ad1
Advertisement ad1
Advertisement ad1

U Montri Rangbah ka jylla, u Conrad K Sangma da ong u wa ka Lockdown næ wow khangsbak ye ko wow pynsuki næ pynsangeh ya i ku kiwa yabi ya u khñiang COVID-19, tangwa daw pynsangeh leh yei im wa man-ka-sngi yong ki paidbah, wei da pynrap u wa hadien wa lai lyngba ha u snem wa da dep, ka sorkar da hap ko wow pyrkhat lang neibynta i im wa man-ka-sngi ki paidbah, ka kamai kajih wa i chngaaiñ ha i chait i khiah.

Da ong u wa i pynkrehkaam da ka Lockdown i eh daw mih ki ha i im wa man-ka-sngi ki paidbah wei ym toh leh iwa suk ya ka sorkar neibhah wa daw ktah ya i yoh i kot yong kiwa kreh ya ki kaam kiwa khian, kam kiwa mylla sngi wa ki warep, tangwa da ong u leh wow yada na iwon iwon i ku yong i yabi ka khlam, ka sorkar da pynkrehkaam ko wei da kdoh da khoom leh ya kiwa boon ki bynta ka jylla.

Advertisement ad1
Advertisement ad1

Kam wow kdaw wa ka Supreme Court ka ri da pynsñiaw ko cha ka sorkar pyrdi wow bichaar biang deiwa pynkrehkaam biang ya ka Lockdown ha waroh kawi ka ri neibynta wow pynduna wei wow kdoh yei ku kiwa yoh ya u khñiang COVID-19.

Hawa kylli, u Montri Rangbah da ong u wa iyi wa jia katni ha ka ri waroh kawi toh iwa ym pu jooh em jia, tangwa yow yada yei yabi u khñiang, ki paidbah toh u sñiawthooh ki wa emkaam wow sumaar ya idæ, heiwa da kyntu u ya kiwa chong chnong wow bood ryntih ya ki kyndon kamwa da phah da ka sorkar, wei ya katni da pynkhlan bait da ki Containment Measures.

Hawa yatoh wa i pynkhreh ya ki thaw sumaar, u Conrad da ong u wa ka sorkar ha waroh chi snem ka kreh chitom ko wow pynkhlan chooh chooh ya ki thaw sumaar kiwa em ha ka jylla, da ong u wa iwa emkaam ya ka sorkar toh wow chim ya i rai ha i por wa biang neibhah lada boon mynkna ki thaw thiah, u man ko iwa eh wow kdoh u khooh yei long i man, iwa da pynman ya ka sorkar jylla wow pynkrehkaam ya ki kyndon nadooh wa ka jylla em ko hapoh 1000 ngut kiwa yabi ya u COVID-19.

Share this:
Previous

Da toh pynhaap ya kawi ka snieh-poisa hawa lai na Mihmyntdu cha Jowai

Next

U khang chwa ya ka Iaw Pyngkat Mynso