Kawa e ktien ka National People’s Party (NPP), ka Dr. Mazel Ampareen Lyngdoh da ong ko wa ka Bharatiya Janata Party (BJP) ym em da leh ‘Home Work’ ko ha kani ka jylla, wei ka ‘Manifesto’ kawa da pynlait neibynta ka Election ha ka jylla da pynyoo che yei man kam ka seiñ kawa na baar ka wym sñiawthooh iyi iyi chaphang ka jylla.
“Ileh u em kam katæ ka Political Party ka wym leh hok ya ki khynroo wa kiwa da heh rta ha ka jylla hadooh wa ki khon chynrang da sñiawmong ki,” da ong ka Ampareen hawa kynthah ya ki kular Election yong ka BJP.
Man ko kawa bha wow e lai puræ deiwa khlem emkaam su ya ki khon kynthai nadooh KG hadooh PG, tangwa da kylli won kammon ka BJP daw pynlai ko ya kani ka Scheme.
“I da yoo i wa boon na ki Scheme yong kini ki bru toh kiwa hap wow pynyabi lut wa u Aadhaar. Ha ka jylla yong i kiwa boon kiwa chong chnong ym pu em Aadhaar ki, wot nga leh ym em Aadhaar O,” da ong ko deiwa kylli leh, “Daw e namo ym e phi ya ka dud wa ka umngap wow chlai ha kani ka jylla yong i kawa khlem booh kyndon.”
Hajrong ka kular thied Scooty ya ki kynthai kiwa lehbha ha ki Exam, ka Ampareen da ong ko, “I sñiawsuk i tangwa ha kani ka jylla kam kani ka kular ye ko wow man cha wa palat neibhah ya kani ka jylla da e burom chwa ya ki khon kynthai, toh u e lang leh ya ki khon chynrang.”
Hawa yatoh wa i kular wow e T. 1000 chi bnai ya ki khynroo wa lai puræ ki wym pu yoh kreh, ka Ampareen da ong ko wa kam kini kammon u pynpoi ki ya kani ka poisa cha ki khynroo heiwa i thap pyrtuid leh dam man ko iwa eh bha.
“Wow e bai baam ya kiwa da tymmen, ka jylla da dep leh nadooh wa synchaar ka Congress, wei ka sorkar MDA da dep ko wow pynku ya ka bai baam yong ki bru tymmen na ka T. 6000 chi snem cha ka T. 9000,” da ong ko deiwa kylli leh, “Ka sorkar bei daw kyntait biang ko næ kammon ya kiwa yoh Scheme na ka sorkar jylla.”
Hawa yatoh wa ka kular wow e mynkna ya u khoo wa kiwi ki mar baam lyngba ka PDS, da ong ko wa ka Card yi u pynmih ki, hawa du kiwa em hok wow yoh ya ka card rachon leh ym yoh ki.
“Ong phi wow e T. 24,000 ya ki manbei wa dooh wa duk, kiwa da yap kurim, ileh wym e lang phi ya ki manpa neibhah em boon ki manpa kiwa ri hi ya ki khon neibhah wa da khlaad noh ka bei,” da ong chooh chooh ko.
Da ong ko leh wa i kular yong ka BJP wow e T. 50,000 ya ki khon kynthai toh kawa da noh chilliang chwa, wei toh u pynche ki, deiwa kylli leh wa lada kani ka poisa toh ka wow pynemkaam ka bei wow pynheh pynsan namo toh kawa daw booh bait ha ki Bank.
“Lada dang hap phi wow ya krehlang wa kiwi ki sorkar daw e namo ym em de, lane kani toh du lada jop ki 31 ngut ki MLA,” da kylli ka Ampareen.
Hawa yatoh wa ka kular wow seiñ khih ya 3.5 lak ngut, ka Ampareen da kylli ko wa kammon u jied ya kitæ ha ka jylla wa da jan dap 35 lak ngut kiwa chong chong. “Kammon u jied phi du 1%,” da kylli biang ko.
