U montri ka chnat puræ puthi u Lahkmen Rymbui, ynnin ka sngi da ong u wa ka sorkar MDA da kreh ko da ka thong wow wanrah ya ka roi ka paar ha waroh i liang hapoh ka jylla, “Em kiwa ong wa i ym em i yaka luti wow lai. Nga u ong tikna O wa i em i ka luti wa da booh yow poi thong wow chakri ya ki paidbah. I hap i wow jubab cha ki paidbah ym du ya kiwa kiwa kwah du wow beiñ wow boh.”
Ya ini da ong u heipor wa embynta lang hei wow booh mooyurim yaka yung thymme ka Capt. Williamson A. Sangma Memorial College ha Baghmara, South Garo Hills.
Hawa kynmoo ya i sien wa nyngkong wa poi u cha ka District ha u 2018 hadien wa seiñ yaka sorkar MDA, u Rymbui dong u, “U sarok toh uwa sih hadooh kattæ kattæ wa ki pulit wa bood ya nga da hap ki wow hiar yow ngiat yaka kari boon sien, nalor wa u sarok ym toh uwa yillih wei kynthih ka kari neidaw wa boon ki thlu. Nga kmen O wow yoo wa ki sarok hapoh ka District da sdang ki wow bha u miat katni.”
Da yaroh u leh ya u montri rangbah yei pteiñ u wow kyrchaan yow pynbha pynmiat yaka puræ puthi hapoh ka jylla.
“Ka sorkar wa katni da ye ko wow pynkylla dur yaka puræ puthi hapoh ka Meghalaya wei daw kylla chooh chooh ko,” da ong u Rymbui deiwa pynrap wa iwa da pynkylla ha ki kaam puræ puthi daw yah luti ko yaka jylla cha i roi i paar.
Da pyntip u wa ha u snem 2008, le tylli ki College sorkar jylla da jied wow pynkylla dur noh ki tangwa ka sorkar warim ym em chimkhia ki wow pynbha pynmiat ya iwa emkaam kini ki College.
“Ka sorkar MDA hapoh i yahkhmat u Conrad K. Sangma da ye i wow yakrehlang yow wanrah yei kylla haka jylla,” da ong u Rymbui deiwa pteiñ u yaroh ya ki MLA ka thaaiñ u Rakkam A Sangma wa u Samuel Sangma yei rai yong ki wow ya krehlang yow wanrah yaki roi ki paar ha South Garo Hills.
Da pyntip u leh wa ha u snem 2022 daw pyndep noh ya kani ka yung thymme ka Capt. Williamson A. Sangma Memorial College. Da pyntip u leh wa chong hei mynjur ka North Eastern Hill University (NEHU) ya ki Post-Graduation Course haka History wa Education daw sdang ha Tura Govt College wa ha Kiang Nangbah Govt. College, Jowai.
Deiwa yaroh ya u montri rangbah, u Rymbui da ong chooh chooh u, “Kani ka sorkar da leh ko palat ya iwa ye kiwi ki sorkar wow leh kiwa da yoh chwa wow chakri palat-6-7 snem.”
Da ong u wa ki 40 tylli kiwa dang thymme ki Eklavya Model Residential Schools (EMRS) daw pynkylla dur ki yaka puræ puthi hapoh ka jylla.
