U montri ka chnat i chait i khiah ka sorkar pyrdi, u Dr. Harsh Vardhan ynne ka sngi da booddien u yei yakhun ya ka khlam COVID-19 wa ki montri i chait i khiah wa ki Principal Secretaries/Additional Chief Secretary ka West Bengal wa yong ki 8 tylli ki jylla ka thaaiñ mihsngi hei emlang u montri khynnah ka sorkar pyrdi wa pait ya kani ka chnat, u Ashwini Kumar Choubey.
Katkam wa man katni ha kini ki jylla da sakhi yei ku kiwa dang chah ktah ha ka khlam COVID-19 wei da em leh boon ngut kiwa da dooh yei mynsien yong ki neidaw kani ka khlam.
Ha kani ka yalang da emlang u Biplab Kumar Deb uwa man u montri rangbah ka Tripura, u Keshab Mahanta u montri i chait i khiah ka Assam, u A.L. Hek uwa man u montri ka chnat i chait i khiah ka jylla Meghalaya wa kiwi kiwi ki montri na ki jylla ka thaaiñ.
Neiliang u Dr. Vardhan da e khublei u ya i ye ki jylla wow yakhun ya kani ka khlam deiwa ong wa da yakhun ya ka ha u 2020 wei chirup u yakhun ya ka ha u 2021 hapoh i yahkhmat u montri rangbahdooh ka ri.
Da ong u wa nei em du kawi ka Laboratory heipor wa sdang kani ka khlam, katni da em palat 2000 tylli ki Laboratory du neibynta wow Test COVID ha waroh kawi ka ri.
Da ong u wa ha kini ki sngi wa dadep ka India da ye ko wow e hadooh 18 klur sien i tika deiwa kdaw leh wa katni dang em 1 klur sien i dawai wa dang em ha ki sorkar jylla.
“Hapyrdi u Naisaphra wa u Kmaichonglad (December) 2021, ka India u thied ko hadooh 216 klur ki tika, heiwa du hapoh u Naiynñiaw daw thied ko 51 klur sien ini i tika,” da ong u Dr. Vardhan. Da pynrap u leh deiwa ong wa chwa wow kut uni u snem da toh u ye wow e tika ya waroh kiwa da noh i rta hapoh ka ri.
U Dr. Harsh Vardhan da kdaw u leh yei eh i khoo wa chem ki jylla ka thaaiñ heiwa ha Mizoram aw jan ha waroh ki District da ku biang kiwa yoh COVID-19, ha Nagaland da ku na ka 15-20 ngut cha ka 300 ngut kiwa chah ktah ha ka chi sngi, ha Assam, Kamrup (Metropolitan) da em palat 45% kiwa dang chah ktah thymme, ha Meghalaya ka East Khasi Hills wa Ri Bhoi da boon bha kiwa chah ktah man-ka-sngi, heiwa da kdaw u leh ya kiwi ki jylla kiwa da sdang chah ktah joor bha ha kani ka khlam.
Da kdaw u wa ha ki jylla wa khian da sakhi wa sdang boon kiwa chah ktah katwa kamtæ emkaam wow man kiwa syndong deiwa kyntu ya ki jylla wow pynkhlan ki wow leh ya ki Test wei wow pynjanai ya ki thaw sumaar.
Neiliang u Ashwini Kumar Choubey, MOS (HFW) da ban joor u yei emkaam wow pynboon ya ki Test khamtam da ka RT-PCR wei da emkaam wow pynkhlan leh ya ka Tele-consultation khamtam ha ki jylla ri-loom.
Ha ka yalang da kyntu leh wow pynduna yei pynsepai ya i tika (Reduce Vaccine Wastage) neibhah wa ka Assam, Manipur, Meghalaya wa Nagaland toh ki jylla wa pynsepai boon i tika wei wow kyntu ya ki jylla wow pynchlur ya kiwa kreh wow pynduna wow pynsepai ya i tika.
