U National President ka National People’s Party (NPP), u Conrad Kongal Sangma da ong u wa man iwon iwon iwa sñiawsih wow yoo yei yakhih yei thang yung, neibhah ka jylla Meghalaya toh kawa burom ya i synchaar paidbah wei kawa pdiang ya i rai ki paidbah.
Kam wow kdaw heini, hadien wa kyrchaan ki 2 ngut ki MLA ka HSPDP ya ka seiñ NPP wow chna sorkar, ynnin hi ka sngi kattu katni ki damok da lai thang ki ya ka yung krehkaam u Methodius Dkhar kawa em ha Laitumkhrah.
Da ong u wa lyngba ka rukom synchaar paidbah daw chna ya ka sorkar, heiwa da kyrmen u wa ki paidbah ym embynta ki ha kam kini ki kaam kiwa ymye wow pdiang.
U Conrad uwa man leh u Montri Rangbah wa pait chipor ya ka jylla, da ong u wa ka sorkar da chim ko ya ki rai wow yada na iwon iwon i jia wei ym em e bor wow pynman ya ki yalang paidbah neibhah kam kini ki yalang pynyoo i wa emkti ki bru samen yong ki kattu katni ngut.
Heiyatoh wa i dawa Montri Rangbah da u Khasi, u Conrad da ong u wa ha ka synchaar paidbah toh lyngba ka rai yong ki paidbah wei em ki kyndon wa hap wow bood wow yoh ya u Montri Rangbah, wei da pynrap u wa em i sñiaw tangwa ha ka synchaar paidbah hap wow lai bait ya ka rai ki paidbah wei hap leh wow pdiang.
