Kiwa wan yalap Election ka BJP da pteiñ ki wow wan hiar chapoh ka jylla Meghalaya heiwa ha ka 17 tarik uni u bnai da wan u Montri Rangbah ka Assam, u Himanta Biswa Sarma uwa da lai cha soo tylli ki thaw ha Garo Hills kitæ ha Mahendraganj, Rongjeng, Mendipathar wa ha Kharkutta wei ya u Himanata da wan wow pdiang ya oo da kiwa boon ki paidbah.
Hawa paan ya ka Vote ki paidbah neibynta ki kyrtong ka BJP, u Himanta Biswa Sarma da khana u katwon smat wow dep pynkreh ya ki Scheme ka sorkar pyrdi ha Assam hawa nujor wa ka Meghalaya. Da kam u leh wa ki myntoi wa toh u yoh kam na ka PM Awas Yojna da yoh myntoi du ki kattu katni donhi ki manyung ha Meghalaya hawa nujor wa ki manyung hapoh Assam. Da ong u wa kini ki Scheme daw poi sakhiat ki cha ki paidbah du lada poi da ka sorkar BJP hapoh ka jylla wei ki kaam baamtooh leh daw pyndooh ki.
U Himanta Biswa da khana u leh wa hadooh katwon krehkaam ka Arun Uday Scheme ha Assam. Da ong u wa hapoh kani ka Scheme kawi ka kynthai ka wym pu em kurim lane ki kynthai wa da heh rta kiwa wan na kawi pa kawi ka manyung wa dooh (BPL Family) da yoh ki mar T. 1200 man ka 10 tarik u bnai wei hapoh Assam da em awjan 35 lak ngut ki kynthai wa yoh myntoi na kani ka Scheme. Kamtæ da ong u wa ka BJP ye kow wow leh ya ini i jooh ha Meghalaya lada yoh ko wow wan hei bor.
Da khana u leh wa ka sorkar BJP ha Assam da kular ko wow e kreh ya 1 lak ngut ki khynroo ynnin u snem, wei da em 50,000 ngut ki khynroo kiwa da yoh kreh, wei kiwa dang sah daw yoh kreh ki chwa u Naisan ha uni u snem.
Kamtæ da ong u wa ki khynroo ka Meghalaya da chem chitom ki neidaw wym yoh kreh ki wei du ka BJP wa ye u e kreh hapoh kani ka jylla.
