Ka National Highways Authority of India (NHAI), kawa man ka chnat yong ka Ministry of Road Transport and Highways ka sorkar pyrdi da pynmih ko ya ka Mobile App wa tip kam ka ‘Harit Path’ wow booddien yei thaw, i heh, i jait ki dieñ, i sumaar yong ki dieñ wa da thung kani ka chnat.
Ya kani ka App da pynlait da u montri kani ka chnat, u Nitin Gadkari ynne ka sngi.
Katkam ka NHAI ini man i kam chibynta yong i lehwarom ya i dap 25 snem i chakri ko ya ka sorkar wei da rai ko leh wow kreh hajrong ka thong, ‘Harit Bharat Sankalp’, wow thung dieñ ha kylleiñ ka ri wow yada ya ka rymaw.
Hapoh kani ka thong, ka NHAI da thung ko hadooh 25 lak ki dieñ hapoh 25 sngi ha tymbud ki sarokbah National Highway nadoh ka 21 Naiynñiaw hadooh 15 tarik uni u bnai wei waroh ki dieñ wa da thung ha uni u snem da em ki 35.22 lak tylli.
Ya ini i thung dieñ da pait da ki Regional Office ka NHAI hajrong ka thong wow pynyirngam ya ki rood ki sarokbah.
Na kini ki dieñ hadooh 5 lak tylli toh kiwa da thung ha Uttar Pradesh, bood sa ka Rajasthan heiwa da thung 3 lak katwa ha Madhya Pradesh won da thung 2.67 lak tylli.
Khnang wow pyntikna wa waroh kini ki dieñ im ki wei wow jrong ki hadooh 1.5-meter toh ka thong wa khroo dooh.
Wow booddien wa im wei jrong kini ki dieñ da booh ya ka Harit Path heiwa daw boh ya ka yutip man ka 3 bnai ha ka AI Powered Big Data Analytics platform – Data Lake yong ka NHAI.
Ki Contractor toh u bahkhlieh ki wow yada wei wow thung da kiwi lada jia wa yap næ wiar ki tre dieñ.
