Ka chnat Transport ka jylla lyngba u Montri yong ka, u Dasakhiatbha Lamare ynne ka sngi da paan poisa (Supplementary Demand) neibynta ka chnat kawa T. 2,50,00,000 yow pyndap yeiwa emkaam ka chnat.
Hajrong ini, neiliang u MLA ka Umroi, u George B Lyngdoh da wanrah u ya ka Cut Motion deiwa ong u wa kani ka poisa wa dang paan da yoo wa man ko leh kam chibynta wow su ya ka tulop ki wakreh ka MTC neibynta u Duyatra, Thohlakhmi wa Wisu 2021.
Kamtæ da kylli u wa ini wadep hapoh ka dorbar da khana wa du ka kuna na ki kari kamai da em T. 10,000 kawi, deilang wa ki kuna wa da toh ki kari Local Taxi na ki por cha ki por kammon dang duna poisa ka chnat. Da e buit u leh wa ileh wym chna ya ka thaw pynyieñ kari yow yoh poisa.
Neiliang u Montri ka chnat da pyntip u wa ka MTC ymtoh kawa ye u pynmih poisa hadooh wa yoh nong yow su yeiwa emkaam hadooh ka tulop ki wakreh.
Da pyntip u wa da mynjur da ka sorkar wow su da ka tulop katkam ka 5th Pay Commission nadooh wa sdang u 2021 heiwa ka MTC da yoh ko T. 2,89,00,000 yow su yaka Arrear nadooh u Duyatra 2019 heiwa da paan leh wow pynkrehkaam noh ya ka 5th Pay Commission nadooh u 2017 wei yow leh yeini da emkaam T. 3.5 klur.
Heiyatoh wa iwa u buit u George, neiliang u Montri da mynjur u wow chimkhia.
Heiyatoh waka Inter State Bus Terminus (ISBT) kawa em ha Mawiong, Shillong neiliang u Montri da pyntip u wa daw wai noh ya ka ha ka 01-04-22 heiwa da sahteiñ neidaw wa em ka Lockdown heiwa katni 95% i kreh toh iwa da dep wei da sdang leh u pynemkaam ya ka wei katni chong sei yabhah ya ki dukan ki Restaurant wa kiwi de kiwa em ha kani ka ISBT.
Neiliang yong u George da yooluti u wa ini ym toh iwa pynbiej bru neidaw wa katai ka sngi toh kawa tip kam ka sngi wa leh danda deiwa thok bru.
