U kyrtong ka National People’s Party uwa man leh u MDC na Mawlai Constituency, u Teiborlang Pathaw da ong u wa ka mukotduma namo ka Case pyrchah ya oo toh du kawa chah pharep wei ini i chah ujor u toh kawa da slem nadooh u snem 2017 wei ka mukotduma toh kawa dang lai hadooh katni.
Kam wow pynkynmoo wa hadien wa phah ka Election Commission of India wa ki seiñ saiñpyrthai toh u pyntip paidbah ha ki khubor lada pynyieñ ya ki kyrtong kiwa em ha i chah pynbaad wa emkti ha ki kaam pyrchah aiñ lane kiwa em ya ki mukotduma pyrchah ya ki ha ki Kasari. Neiliang ka NPP da pynbna ko ya 3 ngut ki kyrtong kiwa em ya ki mukotduma hapoh ka Kasari wa kynthup ya ka Dr. M Ampareen Lyngdoh, u Thomas Sangma wa u Teiborlang Pathaw.
Hawa kylli hajrong kani ka mukotduma, u kyrtong ka NPP da ong u, “Hadien wa ka Election Commission da pynmih ko ya ki kyndon, neiliang ka Party leh da khana wei da pyntip ko kamwa da toh u leh”.
Da khana u wa nadooh u snem 2018 leh da pyntip u cha ki bor pynlai Election hajrong i em ya katai ka mukotduma lyngba ka ‘Affidavit’, “Tangwa neidaw wa ki kyndon ka ECI ha kani ka kynti da phah wow pynbna paidbah ha ki laad pathai khubor, ka Party leh da leh ko ya ini”.
Da ong u wa kani toh ka chah pynbaad nadooh u snem 2017, wei katni dang sahkut hapoh Kasari.
“Neidaw wa nga ym em leh O ya iwon iwon iwa sih, kamtæ nga leh da yakhun bait O ya kani ka mukotduma,” da ong u Teibor deiwa pynrap leh wa da ieh u hei stat yong ka yung bichaar wow rai hajrong ini i chah pharep.
