Ka kyrtong yong ka National People’s Party (NPP) na East Shillong Constituency, ka Dr. M. Ampareen Lyngdoh da ong ko wa i em mukotduma ha kasari ym ktah i ya ka ha kani ka Election.
Da ong ko wa ki paidbah ka East Shillong da che ki chiboon heiyatoh wa kani ka mukotduma, deiwa pynrap wa kani toh ka kabu wow lai yakhun ya ka mukotduma wow pynksan ya i wym emkti yong ka ha ini i kaam, neibhah waroh chi kattu da yaklam du ha luti syngkieñ.
Hadien wa ka Election Commission of India (ECI) da pynmih ko ya ki kyndon wow pyntip paidbah ya ki kyrtong kiwa em i chah pynbaad wa ki mukotduma pyrchah ya ki ha ki kot khubor, neiliang ka NPP da pynbna paidbah ko ya le ngut ki kyrtong, wa kynthup ya ka Ampareen, u Teiborlang Pathaw wa u Thomas Sangma.
Kam wow kdaw wa ka Dr. Amapreen Lyngdoh heipor wa dang ksoh ko kam ka Montri ki kaam puræ puthi ha u snem 2012, da chah pynbaad ko wa emkti ko wow biah sia lieh wei wow thok ya ka Result yaleh kreh kiwa sikai, heiwa da mih leh i dawa wow hiar chuki ko ha itu i por.
