U montri ka sorkar pyrdi wa pait ya ka chnat puræ puthi (Education), u Dr. Ramesh Pokhriyal ‘Nishank’ ynne da pynche u wa ka National Education Policy (NEP) 2020 u pynksan ko ya ka Reservation Policy katkam wa da booh kyndon ha ka riti synchaar (Constitution) ka ri.
Yeini da pynche u hadien wa mih ki khubor ha u bnai wa dadep wa kylli lada kani ka NEP 2020 pynksan ko ya ka Reservation Policy hapoh ka ri katkam ka riti synchaar ka ri iwa da pynartatien ya kiwa boon wa lang.
Da ong u wa chiboon ki Entrance Examination kam ka JEE, NEET, UGC-NET, IGNOU da pynman ya ki hadien wa pynbna ya ka NEP-2020 wei da jied leh ya ki khynnah ha ki thaw puræ katkam kani wei hadooh katni ympu em wa ujor iwon iwon hajrong ini.
U Ramesh da kylli u leh wa neiyi i daw wa hadien 4-5 bnai nadooh wa pynbna ya ka NEP da mih ini i sñiaw artatien deiwa ban joor wa ki rukom puræ (ongoing programs) u pteiñ ki ha ki thaw puræ deiwa kynthup ya ki khynnah na ki jaitbru wa haap hapoh ka SC, ST, OBC, Divyang wa kiwi kiwi kiwa man khian paaid.
Chooh chooh da ong u wa ya ka NEP-2020 da pynjanai hadien wa phyllu yumut wa ki bru samen, ki khynnah, kiwa sikai, ki manbei manpa, kiwa pynlai ya ki thaw puræ, ki bru chemphang wa kiwi kiwi wei hadien neitæ da puræ bniah ya ka da ka Committee for Evaluation ka NEP, Committee for preparation of the Draft of NEP, wa ki Online Consultation lyngba ka MyGov.in wa kiwi kiwi.
U Ramesh da ong u leh wa kani ka NEP da wanrah ya ka katkam ka thong krehkaam u montri rangbahdooh ka ri, u Narendra Modi kawa ong Sabka Sath, Sabka Vikas.
Da kyrmen skem u leh wa kani ka Policy daw wanrah ko yei kylla hapoh ka ri khamtam ha i puræ puthi neibynta ki khynnah wa na ki jaitbru wa haap hapoh ki kyrdan SC, ST, OBC, Divyang wa kiwi kiwi.
Khaddooh da ban joor u leh yei raikut ka sorkar deiwa wanrah yei kylla (Amendment) ya ka riti synchaar ka ri wow pynyinsur sa 10 snem ya ka Reservation neibynta ki Scheduled Caste wa Scheduled Tribes ha ka Lok Sabha wa ki State Assembly.
