Ka yalap Election chiteiñ samoi ka wow man ha ka 30 tarik uni u bnai da poi ko chawa kut ynne i janmiet heiwa ha Bhaitbari, Rajabala Constituency, u Montri Rangbah ka jylla, u Conrad K Sangma chirup wa ki MLA wa ki MDC da pynman ki ya ka Rally kawa heh wow pynyoo yei bor ka NPP.
Ki heh ka NPP da beiñ ki ya ki Party wa em ha ka liang pyrchah khamtam ya ka Congress wa da pynbaad khlem yurim ko ya ka sorkar NPP hawa pynman ya ka yalap Election.
Neiliang u kyrtong ka NPP na Rajabala, u Abdus Saleh da e khublei u ya ki MLA wa ki MDC ka NPP wa da wan kyrchaan yalap ki ya oo ha kani ka kynti deiwa ong wa i jop yong oo u man i jop u Conrad Sangma wei ki paidbah toh u pynyoo ki wa hadooh katwon kyrchaan ki ya ka NPP.
U Conrad K Sangma, uwa da sah ha Batabari la 6 sngi kattu wow yalap ya u kyrtong ka NPP da ong u wa ka liang pyrchah da tieñ ko wa em u ha Rajabala Constituency tangwa oo won em u hapoh ka Constituency wow tip yei eh i khoo wa chem ki paidbah.
Da beiñ joor u leh wei da pynbaad u ya u Mukul wa u Zenith wa da sdang ki u thok neibhah wa da tieñ ki wa ka NPP da sdang ku bha ko hapoh ka Rajabala Constituency.
Chooh chooh da ong u wa ki paidbah da jied ki ya ka Congress ha u 2018, tangwa ini waroh da kylla i kattu neibhah wa ka NPP toh kawa synchaar ya ka jylla wei da rai ko wow wanrah ya ki kaam pynroi ha kylleiñ wei wow wanrah yei yatylli hapoh Rajabala khlem da pynyaphær jaitbru lane ha ka niam.
Heijooh i por u Conrad da ong u wa ka NPP daw jop ko ha waroh ki le tylli ki Constituency wa daw pynman ya ka Election chiteiñ samoi.
