U Montri Rangbah ka jylla uwa man leh u khlieh ka NPP, u Conrad K Sangma ynne da sdang u ya ka yalap Election namo ka Election Campaign ha Manipur na Aba Ground, Kshetrigao Constituency, heiwa da pynman ya ka yalang yalap neibynta u kyrtong ka Party, u Sheikh Noorul Hassan, u wow yakhun ha ka 12th Manipur Legislative Assembly 2022.
Ya u Conrad da synraan da ki ar ngut ki MLA, u Thomas Sangma wa u Marcuise Marak ha ka yalang wa man ha Imphal.
U Conrad da lai yalap Election u ha ki ar thaw, ka Kshetrigao Constituency wa Yaiskul Constituency, heiwa u MLA wa katni u Huidrom Vikramjit Singh toh u kyrtong ka Party.
Hawa klam ha ka Rally, u Conrad Sangma da ong u wa ka Party yajan bha ko wa ki paidbah ka Manipur wei neini i daw kyrchaan ki ya ka NPP.
Da ong u leh wa ka NPP toh ka Party wa kreh neibynta ki paidbah ka thaaiñ mihsngi heiwa da kyrmen u wa ki paidbah daw kyrchaan ki ya ka Party kawa kreh hadooh wa yoh ya i thong i jop.
Heijooh i por da ong u wa ki paidbah ka Manipur da thooh salan ki da kiwi ki Party wei ka NPP toh kawa miat dooh wow pyndap yeiwa thylli.
