Shillong: Ka Congress ynne ka sngi da ong ko wa ka National People’s Party (NPP) toh u mih noh ko na ka National Democratic Alliance (NDA) kawa da yahkhmat da ka BJP wow pynsakhiat wa ki ymtoh ka jooh ka Party waka BJP.
Ka AICC Media-Coordinator ka Bobeeta Sharma da ong ko wa lada leh ka NPP katwa leh ko wow pynche ya ka yurim wa yieñ ko hei yatoh waka BJP ymye ki u pynche wa ki ym toh ka jooh ka Party waka BJP.
“Lada ka NPP ym emlang ko waka BJP neiyi i daw wym mih noh ki na ka NDA yow ngait ki paidbah,” da kylli ka Sharma.
Ka AICC Media-Coordinator da ong ko leh wa u State Unit President ka NPP u Dr. WR Kharlukhi kwah u wow pynyoo wa ka NPP ym em yatoh ko waka BJP hadooh wa ong u wa kyrchaan ko ya u Nitish Kumar ka Janata Dal (United) kam u Montri Rangbahdooh ka ri.
Da kylli ko ko leh wa iyi i daw wa sarom ka NPP ya u Modi syndet syndet.
Yow pynsakhiat wa ka NPP man ko kam chibynta ka BJP, u Montri ka sorkar Congress u Ronnie V Lyngdoh da ong u wa da pyrchang u wow yoh ya ki kyntien wa klam u MP ka Tura u Conrad K Sangma wa yaroh u ya u Modi hapoh ka Parliament.
Da kam u leh wa ka NPP man ko ka Party BJP neidaw wa ka kiwa yahkhmat ya ka NPP na ri-loom Jaiñtia wa na ri-loom Garo da khut ki ya ki cha Guwahati wow jied ya ki kyrtong.
Ka Meghalaya Congress da ong ko leh wa ka BJP da kyrriah ko u kyrtong wa tlot u Banteilang Rumnong na Sohra cha Pynursla yow jop u kyrtong ka NPP.
“Kani man ko ka buit wow pynjop ya u kyrtong ka NPP u Prestone Tynsong,” da ong ka Meghalaya Congress.
Discussion about this post