August 28, 2022
Ka yalang yong ka National Committee ka National People’s Party wa da pynman ynnin ka sngi ha Constitution of India Club, New Delhi wei ya kani ka yalang da pynlai da u National President ka Party, u Conrad K Sangma hei emlang kiwi ki heh ka NPP.
Ha ka yalang ka Party da klam yillu hajrong ki Election wow wan ha Meghalaya, Tripura wa Nagaland.
Hawa yaklam wa kiwa pathai khubor, u Conrad K Sangma da ong u wa ka Party da man ko kawa da pynkhreh bha neibynta ka Election wow wan.
Chooh chooh da ong u wa ka NPP ym yakut lok ko, wei ka NPP samen u yakhun ko ya ka Election khlem yakut lok chwa wa ka BJP næ kiwi tawon ki Party.
Hajrong i wan psiah ka TMC ha Meghalaya, u Conrad da ong u wa da ksoh ki yei thaw kam ki liang pyrchah wei da wanrah i leh ya i sñiawthooh bakla para ki.
Da ong u wa ka TMC da psiah ko cha Meghalaya wei da pyrchang ko wow pynawri tangwa ini ymtoh iwa suk wow ktah ya ki paidbah.
