theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1
Advertisement ad1

Ka NPP u yieñ yaleh Election ko samen wei daw chna sorkar biang ko ha u 2023: Prestone

U National Vice President yong ka seiñ National People’s Party (NPP), u Prestone Tynsong da ong u wa ka seiñ daw yakhun ko samen ha ka Election MLA kawa daw man ha u snem 2023 khlem da yatoh lok wa kawon kawon ka seiñ leh wei da kob u leh wa daw yahkhmat hi ya ka sorkar.

“U yieñ bait samen wow yakhun ya kani ka Election wow wan wei i ym em i ya kawon kawon ka sñiawthooh yumut wa kawon kawon ka seiñ leh wei ka rai yatohlok daw chim won hadien wa da dep u ñiaw ya ki Vote,” da ong u Prestone Tynsong uwa man leh u Symbood Montri Rangbah hawa klam wa kiwa thoh khubor.

U Prestone da ong u wa i yakhun ha kani ka Election MLA ym toh hapyrdi ka NPP wa ka UDP tangwa ka yakhun u em bait ko hapyrdi ki kyrtong ha man ki Constituency wa yakhun ki.

“Ym em u kyrtong u wow mih wow yakhun kamtu donhi tangwa hawa mih ka thong u man bait yow jop, kamtæ ka yakhun hi u man bait hapyrdi ki kyrtong, ym phær la ki toh na kawon kawon ka seiñ saiñpyrthai leh,” da ong u Prestone.

Uni uwa yahkhmat ka NPP da ong u i thmu yong ka NPP toh kawa da che kdar wei itæ toh wow chna hi ya ka sorkar hadien wa da dep ka Election MLA ha u snem 2023 wei ka yakhun yong ka NPP ym toh pyrchah ya kawi ka seiñ tangwa pyrchah ya waroh hi kiwa yieñ wow yakhun.

Da ong u wa i pynsñiaw wow yakhun samen ym toh du ka seiñ BJP tangwa kam ini i klam da mih leh na ka seiñ UDP wei leh na kiwi ki seiñ saiñpyrthai kiwa da pynsñiaw wa daw yakhun hi ya ka Election MLA khlem da yatohlok.

Ha iwi won i liang, u Prestone da ong u wa kani ka sorkar kawa da yahkhmat da ka NPP toh ka sorkar kawa nood u chim yei rai wow pynbait ya u pood u ang uwa da sahteiñ 50 snem wa ka jylla Assam.

“Nga ym yoo oo wa daw em iwon iwon i ktah ha ka Election ya kani ka sorkar kawa katni neibhah wa toh ka sorkar kawa nood u chim ya ki rai kiwa eh, la ha u pood u ang næ kiwi kiwi,” da ong u.

Share this:
Previous

Ka 15 tarik ka sngi khang kiad ha East Jaiñtia Hills

Next

Lai kem biang ki pulit ya u Bernard hadien wa chah pynngat sa ha kiwi ki kyndon aiñ