U MP ka TMC cha ka Rajya Sabha, u Derek O’ Brien ynne ka sngi da wan hiar yalap Election u ha Iawmusiang, Jowai neibynta u Awhai Andrew Shullai u kyrtong ka TMC na ka 2-Jowai Constituency, wei hawa klam da khut kyntu kyrsu u ya kiwa kyrchaan u Andrew Shullai wow kreh chitom ki sa 12 sngi yow pynman ya oo kam u MLA.
Ong u leh wa la jop u Andrew wymtoh kat u yoh MLA ki, tangwa yoh MP ki leh neibhah oo daw yakrehlang lang u chirup chirup wa u Andrew kamjooh wa ki paidbah.
Da pynsñiaw u leh yei kular ka TMC neibynta u paidbah la poi ko hei bor, itæ kynthup ya ka T. 1000 chi bnai u yoh ki kynthai mar ya dap 100 sngi i lai luti ka sorkar, daw pynyoh leh 3 lak tylli ki kreh ha Meghalaya, daw pynyoh Health Card neibynta u yoh mynkna ka bai dawai bai chah sumaar hei pyrtuid ka manbei yong ka yung, u pynyoh yarap yaki khynroo wa kiwi, najrong i kular wow yakhun pynyoh i tipmit yaka ktien Khasi deiwa yasaaid hapoh Parliament.
Wei kini kiyi kiyi waroh wymtoh du kat u kular donhi, tangwa u pyndep leh yei kular.
Da kdaw u leh ya artylli ki Party ha Meghalaya ka NPP waka UDP heiwa kini man ki kam ki Pipe wow wanrah yaka BJP hapoh Meghalaya.
Ong u wa lada ki paidbah kwah ki u pynwiar yaka BJP, wym toh de u pynlut por ki u Vote ya kiwi won ki Party ha kani ka kynti. Wei em u leh i kyrmen wa ka TMC hapoh Meghalaya daw jop ko hadooh 18-23 tylli ki Constituency.
Neiliang u Andrew Shullai hawa klam ong u wa sñiawsih u wow yoo ha kini ki sngi yei man i long ka yaaw ka haat, ka imlang sahlang wei i daw wa jia ini waroh toh wa ka Policy krehkaam ka sorkar ini wa dep wym em u biang ko.
Heijooh i por leh wa ya ka spah ka phaw, ka kamai kajih da pynlang du kattu katni ngut ki bru kiwa da tooh ya ka poisa ka kamai ki paidbah, tangwa katni won psiah ki cha ki yung ki sem yow tyrwa daka poisa khlem em ka yurim, najrong wot tang ki kaam wa sahteiñ ha Jowai leh wym dep.
Da pynrap u leh wa ha kini ki 5 snem jia i wym jooh jia deiwa pynkynmoo u yei jhep ha Jowai, deiwa ong hei sakhiat neiliang yong oo heipor wa man CEM u da dep sign u ya ka soskular deiwa toh rukom, tangwa neidaw i rhah spah u Urban Minister tæ mih i awri wei kwah u leh u dai dei thaw yong ki hi cha ka sorkar.
Kamtæ kyntu u ya ki paidbah wow pyrkhat bha ya ka Vote wym wow biej poisa neibhah sam chakhmat daw joor i maa.
Kiwi won wa e i klam ha kani ka sngi toh u M.B. Rymbai, CEM warim JHADC, u Brightstar Chyrmang, MDC Jowai North, u Niman Shadap na Mukhla wa kiwi haka yalang wa pynlai da u da Philemon Lyngdoh, MDC warim.
