Uwa yahkhmat ka Bharatiya Janata Party ha Meghalaya uwa man leh u Montri ha ka sorkar Meghalaya Democratic Alliance, u Alexander Laloo Hek da ong u wa i rai wow pyndam næ pynneh ya u President ka BJP ym toh da kiwi won ki Party næ da u Montri Rangbah.
Hawa kylli hajrong i ong u Conrad K Sangma wa kiwa boon ki wakreh ka BJP ym sñiawsuk ki yei rukom krehkaam u President ka BJP, u Ernest Mawrie, neiliang u Hek da ong u wa da em i yaklam wa u Montri Rangbah hajrong i pynbaad palat yong u President ka BJP.
Da ong u wa u Montri Rangbah em hok u wow pynbaad ya u President ka BJP, neibhah wa u Mawrie da kynthah palat u ya u Montri Rangbah wot ya ka yung ka sem, tangwa ym toh won i rai yong u Montri Rangbah næ kiwi ki seiñ saiñpyrthai ya ki kaam ka BJP.
Hawa kylli, da kubur wa em i pynsñiaw para dkhot ha ka BJP wa ym kwah de ki ya u Mawrie wow man u kam u President, tangwa ym pu ye won wow rah ha ka Party, heiwa da pyntip u wa nadooh ki District wa kiwi da pynsñiaw ki yei wym sñiawsuk de ya u Mawrie.
Ha i jooh i por, u Hek ym em kyntait u leh wa kiwa boon kiwa yahkhmat ka BJP da iehnoh kaam ki na ka Party, deiwa ong wa lada em iwon iwon wa hap wow yaklam toh u man bait ko hakhmat yong u President ka Party.
