U President ka Bharatiya Janata Party ha Meghalaya, u Ernest Mawrie da ong u wa ka Party ka yieñ ko ha ka yurim wei ym em kynthah u ya ka sorkar jylla, tangwa pynsñiaw u ya ki phang wei iyi wa yoo u khamtam ha ka liang baam-tooh, deiwa khana leh wa neiliang kiwa yalam ka BJP na Delhi da pynchlur ki ya oo wow lai chakhmat wa ki phang wa chim u.
Da ong u wa i wanrah ya i baam-tooh ym toh wa yaleh pyrchah ya ka sorkar, tangwa toh i pynsñiaw i yong oo ya ka phang, wei da ong u leh wa toh i kamram yong oo kam u President ka BJP ha Meghalaya.
U Mawrie da ong u wa ynne ka sngi neiliang ka BJP da dep ko wow pynbait lut ya i wym ya sñiawthooh ha ka Party, tangwa hawa yatoh wa ka jylla da ong u wa lada em ki phang kiwa ktah ya ki paidbah khamtam ha i baam-tooh, neiliang ka Party ym suki wei daw pteiñ ko wow pyrchah.
Hawa yatoh wa i wym pynkrehkaam ya ki Scheme ka sorkar pyrdi, da ong u wa kani ka phang leh da dep wow rah cha kiwa yalam ka Party ha Delhi heiwa da phah wow pteiñ yei booddien neibhah wa kamwa man katni, i rukom pynkrehkaam da ka sorkar jylla ym em man ko.
U Mawrie da ong u leh wa u Chuba Ao toh uwa wan na kawi ka jylla wei ym tip bha u yei pynkrehkaam ya ki Scheme sorkar, tangwa kam uwa yahkhmat ka Party na kani ka jylla, tip bha ki ya ka rukom pynkrehkaam wei da em chiboon i tkoh, heiwa da pyntip u wa neiliang ka Party da dep ko wow pyntip cha Delhi wei kiwa haneiñ daw phah ki ya ka sorkar jylla kammon u pynkrehkaam ya ki Scheme neibhah kiwa boon ki kaam toh kiwa hap pyndep ha i por.
Hawa kylli hajrong i baam-tooh ha GHADC kamwa da pynbaad, u Mawrie da ong u wa ka kynhun na Delhi daw wan ko yow pait neibhah wa neiliang ka Party da ekit ko leh ya ka RTI ha kiwa yahkhmat ka Party.
Hawa yatoh wa i pynbaad chalan tooh ya u mooyong, u Mawrie da ong u wa ki paidbah ki maad ki yei eh na ini i leh pyrchah yaka aiñ.