Shillong: U MLA ka BJP na South Shillong, u Sanbor Shullai da kyntait wa ym i ya nia na ka BJP pyrchah ya ki paralok wa emlang ha ka sorkar synrop Meghalaya Democratic Alliance (MDA) ha ka yakhun ya ka Election chiteiñ samoi na Shella, tangwa da ong u wa toh ka PDF kawa pynyoo nia pyrchah wa ka UDP.
“Wot uwa yahkhmat ka PDF u Banteidor Lyngdoh uwa man u montri sorkar da ong u wa ham biej ya ka District wa da dawa ka UDP,” da ong u Sanbor hawa klam wa ki laad pathai khubor ynne ka sngi.
Ini i ong u Sanbor toh hawa kylli, wa ki paralok ka MDA da ya sdang ki wow ya nia para ki ha ka Election Shella hanlada emlang ki ha ka sorkar.
“Nga ym em pynyoo nia O, chwa wow thap pyrtuid, ka PDF wa ka UDP da sdang ki wow ya nia neibhah wa ka PDF lyngba u montri wa uwa yahkhmat yong ka da e u da i thoh (Headline) wow ym toh u chah pynbiej ha ka UDP hajrong ka phang wow e District ya ka Sohra neibhah wa man ko du ka nia kawa thok wei da man ko ka kawang ktieh para ki hi, i ym em ong i iyi iyi leh hajrong ini,” da pynrap u Sanbor.
Ha kawi ka liang, u MLA ka BJP da kubur u wa i klam u Hamletson Dohling wa ka sorkar Meghalaya Democratic Alliance (MDA) ym toh ka wow pynku ya kawon kawon ka Party neibhah wa ka man ko ka sorkar khleh khloo lang. Tangwa da ong u, “Ka sorkar pyrdi ha Delhi, toh ka sorkar ka BJP neibhah wa ki paidbah da e ki boon paaid ki hadooh 303 ngut ki MP.”
Discussion about this post