Ka phyllu yumut heiyatoh wa i chah beiñbor ki kynthai

Jowai : Ka tnat puræ ka Political Science yong ka Thomas Jones Synod College ynne ka sngi hei emlang ki bru wa chemphang kam ka Patricia Mukhim, ka Waisa Sumer, u D.G. Dympep wa kiwi da pynman ki ya ka phyllu yumut kawa tip kam ka “Brainstorming Session on Crime Against Women.”

Ha kani ka yalang paidbah da emlang ki pulit kynthai deilang wa u SP ka WJH heiwa u SP da sdang u deiwa ong wa oo yoosuk u wow yoo wa boon ki kynthai wa kreh ha ki ophis sorkar hapoh ka district wa ka jylla waroh ka wi tangwa ini ym ym mut i wa man ki kiwa da lait na kiwa boon ki chah leh beiñ ym du ha ki chynrang kamjooh leh ha ki kynthai.

Ong u wa katni da lai ki sngi ki kynthai leh da chlur ki u wan cha khmat lada chah dat chah choh, chah ksoh bor wei boon ki por cha leh bein ki pyn ha kiwa tipmit wa kiwa yajan wa ki khamtam pyn ha ki kurim yong ki.

Ka Patricia Mukhim da khana ko wa katkam ki RTI wa yoh ko nadooh u snem 2002 hadooh u snem 2013 da em 103 ki Case wa chah thombor ki kynthai boon dooh toh i chah ksohbor, na kini ki 103 da ye u e rai ka yung bichaar katwa du 30 tylli donhi wei ym em u pynchitom ya kiwa emkti. Da ong ko leh wa 22 ngut na kini ki kynthai toh ki khynnah kiwa chah khsohbor pyn ha ki khynnah (minor) hi. Em leh ki case wa sah da ki yong snem wei da hap khang noh ya ki neidaw wa ym ye de u chem ya kiwa emkti.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Da ong ko leh wa ha West Khasi Hills ka Fastrack court yoh ko 10 tylli ki case heiwa 7 tylli na ki da pynchitom ya ki wa emkti.

Kamtæ ong ko wa emkaam u sikai ya ki chynrang u burom ki ya ki kynthai nadooh dang khian wei toh leh u pynwiar noh ya i pynyaphær khamtam ha ki kaam wa ong ini toh yong chynrang ini toh yong kynthai yow em i man salonsar (Gender Equality) nadooh dang khian.

Ka kong Waisa Sumer da klam ko hei yatoh wa i Domestic Violence wa jia ha ka chnong Jowai ha ki yung ki sem ki bru wei ong ko ki kynthai kam ha ini i kaam duna wa mih cha khmat yow li ujor cha ka ophis ka DSWO heiwa nadooh u snem 2012 hadooh uni u snem da em du 18 ngut donhi wa wan chakhmat wei boon toh ki wa chah leh beiñ ha u kurim.

Boon hi ki por ya kini ki kaam pohyung da jooh kset bait ya ki wei ktah ko ya ka yung ka sem hadooh ki khon ki kti. Kiwa wan cha khmat leh boon ki por neidaw wa chimpor u pymih ya ki hukum kamjooh u pynkut ya ki case dooh mynsien ki wow boodien ya ki case.