U Montri Rangbah ka jylla, u Conrad K. Sangma da yaleh u wow pynpoor yaka FOCUS deiwa lai cha kylleiñ ka jylla wow yaklam wa ki warep wei wow pynsñiawthooh ya ki chaphang kani ka thong krehkaam ka sorkar.
U Conrad ynne ka sngi ha Rongjeng, East Garo Hills da ong u wa hapoh ka FOCUS, ka sorkar da mang ko T. 220 klur ya ki 4.5 lak ngut ki warep na ka jylla.
Da pyntip u wa hapoh kani ka FOCUS, ki warep emkaam wow sdang ki yaka Producer Groups (PG) namo ka seiñ ki warep ka wow em 10-20 ngut ki dkhot wei kawi pa kawi ka PG u yoh yarap ki T. 5000 samen ki dkhot.
Da pynche u leh wa ka poisa na ka FOCUS ymtoh ka ram tangwa i yarap ya ki warep.
Chooh chooh da pyntip u wa T. 1000 klur da pynkrehkaam ha ka jylla neibynta i bha ki warep kam hapoh ka Milk Mission, Piggery Mission, Poultry Mission, Ginger Mission, Goatery wa kiwi kiwi.
