U MLA ka VPP na North Shillong, u Adelbert Nongrum, ynne hapoh ka yung dorbar da wanrah u ya ka Zero Hour Notice heiyatoh wa i mih khubor wa pynemkaam bakla ka chnat i chait i khiah hadooh T. 43 klur yow yaleh pyrchah ya u COVID-19.
Neiliang ka Montri ka chnat, ka Dr. M. Ampareen Lyngdoh da pynche ko wa ka sorkar India lyngba ka Ministry of Health & Family Welfare da wanrah ko ya ka Covid Emergency Response Package yow yarap ya ki jylla wow yaleh pyrchah ya ka khlam wei ka Meghalaya da yoh yarap poisa ko ha ki ar bynta (ECTR Phase-I wa ECRT Phase-II) wei ka poisa toh kawa poi naka National Health Mission.
Hapoh ka ECRT Phase-I (2020-21) toh kawa man 100% naka sorkar pyrdi katwa ha ka ECRT Phase-II (2021-22) won da bhah 90% naka sorkar pyrdi katwa 10% won toh u pynlut ka sorar jylla.
Kamtæ da ong ko wa i jubab hapoh ka yung dorbar da u Montri ka chnat i chait i khiah heipor ka Autumn Session 2022 toh ya ka poisa wa da pynlut naka sorkar pyrdi deilang waka sorkar jylla ya u COVID-19 heiwa da pynlut T. 76.56 klur. Wei ka RTI wa da leh da u Disparsing Rani toh kawa kylli katwon ka poisa wa da pynlait heiwa ya ka jubab da e wa hadooh ka 20-01-23 toh T. 104.12 klur wei ini toh iwa biang i jubab ha ka RTI tangwa iwa jubab hawa e hapoh ka dorbar (Autumn Session) toh ya ka poisa kawa da dep pynlut hapoh ka ECRT Phase-II wei kini ki kreh toh kiwa chimpor u pyndep wei kiwa dang lai chakhmat.
Chooh chooh da pyntip ko wa kawi ka bhah na ka poisa kawa da pynlait toh yow chna ya ka Critical Care Block kawa dapoi T. 21.38 klur kawa da e rap hadien bar ya ki bhah kiwa da dep e chwa wei i kreh neibynta kani toh kawa dang dep sdang.
Hajrong ini waroh da ong ko wa ka poisa kawa da sñiawthooh bakla kam kawa da wiar toh kawa ym pu em pynlut wei daw pynlait katkam wa dep i kreh wa da sdang.
Puræ leh: Yoh ka jylla T. 119 klur neibynta ka khlam COVID katwa u James ong u T. 76 klur: Disparsing Rani
