U Montri Rangbah ka jylla u Conrad K Sangma da ong i mih pyrthai wa ka sorkar jylla da pynuiñ noh ko ya ka bhah poisa wa palat T. 5,200 klur toh iwa bakla heiwa da pynche u wa em ka ‘Budget Estimate’ næ ka mang tangka wa da pynkhreh da ka sorkar wei da em leh i pynlut kamjooh.
Ini i ong u Conrad toh hajrong ka bui (Report) ka Comptroller and Auditor General of India (CAG) neibynta u snem pynekaam poisa (Financial Year) wa kut ha ka 31 Wisu, 2020 wei ya ini da wanrah ha ka Dorbar wa dang kut wot yong ka jylla.
Da ong u wa i pynuiñ ym em mut wa toh ka poisa kawa na ki Scheme heiwa da pynrap u wa ha ki snem wa da dep leh ka poisa kawa kynjoh cha ka T. 3000 klur wa T. 4000 klur da pynuiñ ya ka.
Chooh chooh da ong u wa ini toh i rukom wa jooh leh wei da jooh jia i hawa pynkhreh ya ka mang tangka hadien wa yoobiang ya ki yukheiñ kiwa boon, khnang wow ye u kyntu kynrong ya i yoh khrong dan wei toh lyngba ini wa hap wow pynkhreh ha ka rukom kawa paka ya ka mang tangka.
U Conrad da ong u leh wa i kaam ka CAG toh wow wanrah næ kdaw yei duna, wei da jooh leh ki wow wanrah ha ki jylla waphær waphær wa kamjooh da man hapoh Meghalaya wei ymtoh iwa dang thymme tangwa iwa da lai boon boon snem.
Heijooh i por da ong u wa ya ini i kaam da sñiawthooh bahkla wei da pynkylla wa toh ki Scheme kiwa da pynuiñ wei ini ym toh iwa sakhiat.
