U Montri Rangbah ka jylla, u Conrad K Sangma ynne ka sngi da khyrwait u ya ki MLA ka liang pyrchah kiwa dait wei thnum bait yei chim ram ka sorkar tangwa ym kwah won ki wow ap hawa batai ya ki daw wa ki yurim hapoh ka yung dorbar.
Hawa klam cha ki laad pathai khubor ynne ka sngi, u Conrad da kyntait yei kam ki MLA ka liang pyrchah wa ka jylla daw dap ko sa du ki ram donhi. Hawa batai yeini i chim ram ka sorkar, u Conrad da ong u wa da dep batai hapoh ka yung dorbar tangwa ym bien ki wow chong yow ap tangwa kattæ won da thooh daw biang ki.
Da ong u wa ka sorkar ymtoh pynkrehkaam ko ya ki kaam pynroi da ka ram tangwa deiwa yoh poisa ka sorkar jylla na ka sorkar pyrdi iwa da ku bha.
Ka bhah naka sorkar pyrdi wa da yoh na ka dan da ku ko na Rs. 5000 klur cha ka Rs. 9000 klur wei ka dan na ka jylla da ku cha ka Rs. 4700 klur ha ki san snem wa da dep.
Da pynche u leh wa ki ram wa da chim kam na ka World Bank, ka sorkar jylla daw hap ko u su 25% wei kawa sah daw su da ka sorkar pyrdi.
Da ong u leh wa ka sorkar jylla da ye ko wow pynkrehkaam bha ya ka poisa kawa da yoh bhah na ka sorkar India wei kamjooh i pynkrehkaam ya ki kaam pynroi leh da ku da boon chah bar ya ki por wa da lai.
Chooh chooh da ong u wa i chim ram man ko katkam ki kyndon ka Reserve Bank of India deiwa pynrap wa ya kitu ki dkhot ka liang pyrchah kiwa kwah yei pynche u pteiñ hi u pynche ya ki.
Discussion about this post