U heh ka Voice of the People Party (VPP), uwa man leh kam u MLA na Nongkrem, u Ardent M Basaiawmoit ynne hapoh ka yung dorbar da ong u wa em i thut ka Reservation Policy wei ym toh ka Roster System wa leh, kamtæ da e buit u ya ka sorkar wow pynsangeh chwa wow pynkrehkaam ya ka Roster System hapoh ka jylla.
“Hawa yieñ i wow klam chaphang ka Roster System, ym em i yei pyrchah ya kawon kawon ka jaitbru wei ym em pyrchah i ya ka Roster System tangwa kwah i wa ka sorkar hap u pynsangeh chwa ko yei pynkrehkaam ya ka Roster System khlem da pait biang deiwi ya ka Reservation Policy”, da ong u Ardent hawa e yei klam hapoh ka dorbar.
“I thut i ya ka Reservation Policy ym toh ya ka Roster System”, da ban joor u.
Da ong u leh wa kani ka kaam toh kawa ktah bha yei sñiaw ki bru wei kam kiwa mihkmat paidbah hap i wow pyrkhat bha yei kyntien wa pynemkaam i tangwa emkaam i wow sñiawthooh leh yei sñiaw yong i, heijooh i por leh da ong u wa ym em kwah wow chim yei hok yong kiwon kiwon dei wym ktah leh yei hok yong i.
Chooh chooh da ong u wa kam ka Party ym em yalap ko wow choon ya kiwi ki jaitbru deiwa beiñ u ya kitu kiwa pynbaad bait ya uwi wa kitkhlieh ya waroh iwa da jia hapoh ka jylla.
Da pynkynmoo u wa u Symbood Montri Rangbah ka jylla da dep ong u wa hadien ka 2 tarik kini ki bru daw wan ki wow krehlang tangwa daw pynchong ya ki ha tnoom ka Bus wei da jia i thij.
Heiyatoh waka Reservation Policy da ong u wa i bhah 40% ya ki Khasi, 40% ya ki Garo wa 20% ya kiwi toh iwa da leh khlem pyrkhat wei deiwa leh jhan neibhah ha itu i por kiwa yahkhmat ye u man wa tieñ ki wa ya dooh pathan ya ka jylla khlem da pyrkhat yei boon bru heiwa ki Khasi boon ki ya ki Garo.
