Ka satri ki seiñbhalang na Ri-loom Jaiñtia deilang waka Synjuk Waheh Chnong Ri Jaiñtia, Synjuk Waheh Chnong Jowai kawa tip kam ka Joint Coordination Committee for Reservation Policy (JCCRP) da e dorkhat ko ha u Symbood Montri Rangbah ka jylla, u Sniawbhalang Dhar ynne ka sngi heiwa da kdaw wa ha ka 12 tarik u bnai wa dep, neiliang ka JCCRP da dep chong yalang ko heiyatoh wa ka State Reservation Policy.
Ka JCCRP ha ka dorkhat da ong ko wa ympu toh u pynkrehkaam ya ka Roster System deiwa kheiñ nadooh wa sdang pynkrehkaam ya ka Reservation Policy itæ nadooh u snem 1972 neibhah ka Reservation Policy man ko ka wym yahaap de wa i por wa katni.
Ka JCCRP da ong ko wa katni ki bru wa ki khynroo khyllood wa da stat ha ka jylla nang ku i boon ki wei ka Reservation Policy da man ko kawa noh chiliang heiwa ki jaitbru Garo ki biang hi ki ka bhah 40% na ka State Reservation Policy katwa ki Khasi wa Jaiñtia hap yakhun ki para ki neibynta ka bhah wa 40%.
Chooh chooh da ong wa da toh i por wa ka sorkar u sylli (Review) biang ya ka Reservation Policy kawa da kut por khnang wa waroh ki le jaitbru u myntoi ki salonsar.
