15 49.0138 8.38624 1 0 4000 1 https://wyrta.com 300 0
Advertisement ad1

Ka skur hajrong ka nongrim : “Nei doom i langoh chei che”
Emkaam ki khynnah yei maya

0 Comments

Jowai : “Heipor wa wan nyngkong kini ki khynnah ym ye de u pynsangeh yei yaam ki tangwa katni won heipor chuti leh boon kiwa ym bien de u liwan yung” ong ka Headmistress yong ka School of Mother Elizabeth for Visually Impaired Children ka Sister Victoria Suiam.

Kani ka skur wa em ha Nangbah, West Jaiñtia Hills toh kawa nyngkong kam kani ha ri-loom Jaiñtia ka wa esikai ya kiwa duna ha ki khmat yow man ki kiwa tip u puræ puthi kamjooh u pynkhreh ya ki u lai ki cha khmat hadooh wow man ki kiwa yieñ hei yong ki hi kjat yow pynwiar yei dooh kyrmen yong ki.

Advertisement ad1

Ya kani ka skur wa da sdang nadooh u snem 2013 katni da em ko 40 ngut ki khynnah puræ heiwa uwa khian dooh toh uwa 3 snem wa uwa heh dooh toh uwa 15 snem kiwa wan kam na ka chnong Nartiang, Wahiajier, Amlarem, Nongtalang  wa kiwi kiwi ki chong na kylleiñ ka ri-loom Jaiñtia.

Heipor wa sdang ya kani ka skur ka sister Victoria ong ko chem ko iwa eh bha u pynngait ya ki bei ki pa ki khynnah yow wan booh ki ya ki khon ki cha kani ka skur wei boon ym em chaniah wei ym ngait ki wa ye u yarap ya ki khon ki hanlada i lai puræ man i iwa mynkna.

Neilaing u Wyrta hei yoh u ya klam wa kini ki khynnah da chem wa man sakhiat ki kiwa pariah wa kiwa stat heiwa ya ka Braille (ki dak puræ kiwa thlah) da puræ ki chaaid chaaid dei ktien phareng wei kamjooh ye ki u type ya ki dak Braille.

visuimp6

visuimp12

Da chem leh kini khynnah man ki kiwa yinsur mynsien wei kamjooh kiwa phooh rakhai wei ym itæ i dooh kyrmen ha ki.

Ya ki khynnah wa jied wow wan puræ heini man ki kiwa da yoh ya ka Disability Certificate na ka Sorkar wei kani ka skur katni em ko nadooh Nursery hadooh Std 4 wei daw pynku ya ka hadooh Std 8.

visuimp10

Ka sister ong ko wa i kreh wa kini ki khynnah waroh man i iwa suk bha neibhah boon hi na ki toh kiwa ym em u kset ya ki da ki bei ki pa yong ki ha yung bait, kamtæ boon leh man ki tip u lai u wan tangwa em hi leh kiwa da yada palat ki bei ki pa yong ki ya ki hadooh em kiwa ym tip tang u baam wei wow sum tangwa hadien wa da yoh sikai ki katni man kiwa da ye u leh hadooh wow siang yusiang ya ki thaw thiah yong ki pyn daki hi.

Waroh kini ki khynnah toh kiwa sah ha ka Hostel kawa em ha kani ka skur wei wan ki na kiwa boon ki niam wei ym jooh kyntait lada wan ki na kawon kawon ka niam.

Da ong leh wa i daw wa sdang ya kani ka skur toh hapooh ri-loom Jaiñtia boon ki khynnah wa da kha deiwa duna ki khmat næ duna i chynna ki (kamwa rngu) wei boon i por toh iwa hiar pateiñ wei em kiwa da kha ya ki hei duna i bor i khmat hadooh wa kat dang lai i por dang duna i chynna ki.

Da em 8 ngut kiwa sikai ya kini ki khynnah 6 ngut ki sister wa 2 ngut kiwa da yoh sikai hei yatoh u sikai ya ki khynnah wa duna ki khmat.

visuimp7

Da chim leh du 12-13 ngut don hi chi Class wei heipor wa sdang u sikai ya ki toh u em ki 10 snem chapoh ki chynrang wa 11 snem cha poh ya ki kynthai.

Ya ka syllabus yong ki khynnah da hikai ya ki katkam ka syllabus yong kiwi ki khynnah wei da hikai leh hei ktien Phareng (English Medium).

Ka sister Victoria ong ko wa ka skur leh ym pu toh kawa da biang nadong chadong tangwa deiwa wan yarap ki bru samen deiwa e ki da u khoo, ki baam, ka poisa wa kiwi kiwi kani ka school da ye ko u lai cha khmat.

Da pynrap chooh chooh ko deiwa kyntu ya ki bei ki pa wa kiwa hayung kini ki khynnah wow wan pait tista ki ya ki khynnah neibhah deiwa leh kamni neh i maya kini ki khynnah ya ki wei ym sñiawsih ki.

Kamwa chem u Wyrta ynne heipor wa lai yachem ya kini ki khynnah ki da man ki kiwa ka-it mynsien wei kiwa thliang bha wei ym sarom ki u pynyoo jar jiar i sap yong ki.

visuimp

visuimp2

visuimp3

visuimp4

visuimp5

visuimp8

visuimp9

visuimp11

visuimp13

visuimp14

Advertisement ad1

0 Comments

Leave a Reply