Ynne ka sngi man ko ka sngi wa nyngkong yong i kdoh i khoom namo ka Containment Measure wa 10 sngi ha Jowai wow yada nei poor ka khlam COVID-19 kamwa da leh ha kiwi ki District Headquarter ka jylla.
Ynne ha Jowai ki dukan dukdoh waroh da man ki kiwa khang lait noh ki dukan dai dawai donhi kiwa wai.
Da sakhi leh ya i lai i wan ki paidbah hapoh Jowai kiwa lai pyndep ya jar jiar ki kaam yong ki.
I kreh kam i chna i tei ya ki yung ki sem leh da man ki kiwa lai bait kamwa da sakhi ha kiwa boon ki yung kiwa dang chna.
Da chah leh ya ki kari kit-um wow lai luti ki, ki Bank leh da man ki kiwa wai.
Ha ki thaw wow psiah cha Jowai kam ha Yingkieñ Myntdu, ha Laad College wa ha Riatsasim da yoo ya ki pulit wa yang sonteri ki wow khang ya ki kari wow psiah cha Jowai lada ym emkaam ki.
Ya ki pulit da yarap leh da ki dkhot ka Bouncers Association of Meghalaya-Jaiñtia Hills.