Katkam wa pyntip ki pulit, haka 04-03-21, ki bei ki pa ka khynnah wa dang khian rta da ujor ki ha ka Madanrting Police wa ka khon ki da wiar ko heipor wa lai skur ko wei da suba wa da chah phon ko ha u Pankaj Kumar Bharadwaj (22 snem) uwa da wiar leh na i thaw wa em u.
Ha i takit ki pulit da chem wa ya u Pankaj da em wa yoo oo ha Guwahati (Assam), Darjeeling (West Bengal), Siliguri (West Bengal) wa ha Dhubri (Assam).
Neiliang ki pulit da phah ki ya ka yutip chaphang ini cha waroh ki Police Station ka ri yow chem ya uwa suba wa rah ya kani ka khynnah tangwa ym em poi cheiwon cheiwon.
Hadien ini da yoh yutip wa u Pankaj da yut u deiwa yarap ka bei u kawa em ha Himachal Pradesh. Kamtæ ki pulit ka East Khasi Hills da lai ki cha Hamirpur, Himachal Pradesh haka 07-04-21 yow thooh ya kani ka khynnah kamjooh ya u Pankaj waka bei u ka Saraswati Devi.
Ki pulit da yoh ki wow ksoh ya ka bei u katwa ya u khon ko wa khynnah wa chah rah ym em chem ya ki.
Ka takit da yah won ko ya ki pulit wow pteiñ yei thooh ha Jorhat, Assam heiwa ha ka 30-04-21 ki pulit na East Khasi da lai ki cha Jorhat wei da sdang yei thooh deiwa yarap ki pulit ka Jorhat heiwa da yoh wow pynlait ya ka khynnah wei da kem leh ya u Pankaj.
Ki pulit kattæ dang li kit ki ya ka khynnah cha Shillong wei ya uwa chah kem daw li rah hakhmat ka yung bichaar.