Shillong: U montri rangbah ka jylla, u Conrad K Sangma da ong u wa ka sorkar jylla da chimkhia ko yei kaam heiyatoh wa i roi i drugs ha ka jylla wei da phah ya ki pulit wow leh yeiwa emkaam hajrong ini.
“Toh neidaw i kaam wa leh ki pulit wa ki hukum wa da e i tæ da booddien bha ya kini ki kaam,” da ong u Conrad.
Da ong u leh wa kani ka kaam da em i da boon snem wei ym jooh mih i beibhah ym em ware u chimkhia yeini da slem.
Heiyatoh wa i chah khayi ki khynnah wa ki kynthai, u Conrad da ong u wa ka sorkar da chimkhia bha ko yeini.
“Da yoh chiboon ki yutip ha ki bnai wa dadep wei darai wow booddien hok ya kani ka kaam neibhah lada e laad daw mih chiboon ki kaam wa sih,” da ong u Conrad.
Da ong u leh wa kani ka kaam man ko kawa niaar bha wei emkaam waroh ki jylla toh u kreh lang ki chirup.
“Da yaklam i hajrong kani ka phang ha ki kyrdan waphær waphær ha Delhi wei ha ki tayaw mo ki bnai wow wan daw yaklam yillu hajrong kani ka bynta,” da ong u Conrad.
Discussion about this post