U Secretary ka All India Congress Committee (AICC) In-charge Meghalaya, u Manish Chatrath da kyntait u wa em i kyllooh ha ka seiñ Congress ha Meghalaya, deiwa ong wa ka Party ha kani ka jylla ka dang khlan ko wei em ko kiwa yahkhmat wa biang.
Da ong u wa ha ka saiñpyrthai em ki bru kiwa mih wei em leh kiwa wan psiah thymme wei ini i jia ha man ki Party wei ym toh i kaam wa sñiawphær.
Hawa kylli wa ka Congress ym ye de ko wow yoh ya i bor synchaar ha ka jylla hanla em ko boon ngut ki MLA, u Manish da kyntait u wa ka Congress ha Meghalaya da tlot ko deiwa ong wa kamwa man kattæ, kawon kawon ka sorkar toh u pyndep ko ya ka samoi krehkaam hadooh 5 snem wei kamjooh ka sorkar ha Meghalaya daw pyndep ko ya ka 5 snem wei hadien itæ ki paidbah daw jied biang ki, heiwa ka Congress ye ko wow wan biang ha i bor.
Hawa kylli chooh chooh hajrong i ong ka BJP wa ka Congress ha Meghalaya ka hap ko wow khang dukan noh ha u snem 2023, u heh ka AICC da ong u wa ka Congress ym toh ka dukan, tangwa toh ka seiñ saiñpyrthai kawa da rim tam ha ka ri India, wei u neh bait ko ha ini. Hawa yatoh wa i thmu wow mih ki MLA ka Party wow chna da kawi ka Party, u Manish da ong u wa ym em kam itæ i thmu neibhah da dep u wow yaklam wa kiwa yahkhmat ka Party ha kani ka jylla.
U Manish Chatrath da wanpoi u ha nongbah Shillong neibynta wow yachem wei phyllu yumut wa kiwa yahkhmat ka Congress ha kani ka jylla, khamtam wow pynkhlan chooh chooh ya ka Party.
