Shillong: U Working President ka People’s Democratic Front (PDF) uwa man leh kam u montri ha ka sorkar Meghalaya Democratic Alliance (MDA), u Hamletson Dohling da ong u wa i wanrah ya ka Citezenship Amendment Bill, 2016, da ka sorkar National Democratic Alliance (NDA) wa yahkhmat da ka Bharatiya Janata Party (BJP) ha Delhi ym toh iwa jia donhi, wei neiliang ka sorkar jylla ka da pynkhreh ko ya ki aiñ wow yada ya ka jaitbru ha ka jylla lada kani ka Bill man aiñ ko.
“Man ko ka buit yong ka BJP wow pynman aiñ yabor ya ka CAB kawa da dep mynjur ha Lok Sabha wei katni ka kwah ko wow yoh yabor ya ka mynjur sa na ka Rajya Sabha deiwa pynyiñsur chooh ya ka dorbar,” da ong u Dohling.
Yei wow kdaw heini wa ya ka CAB da wanrah ynne ka sngi ha Rajya Sabha, da pynsangeh noh wei u wanrah biang mystep ka sngi, deiwa pynyinsur ya ka dorbar Rajya Sabha kawa toh u kut ha ka 13 tarik cha ka 15 tarik uni u bnai.
Da ong u Hamlet wa i kwah wow pynman aiñ yabor ya ka CAB toh neidaw waka BJP ka pyrkhat bait ko du ya ki Vote Bank Politics, deiwa myllin won ya kiwa boon ki jaitbru ha ri India ki wow chah ktah lada pynman aiñ ya kani ka Bill.
“Dang em i por ya ka sorkar jylla wow bichaar tot pa tot wow pynkhlan ya ki aiñ ha ka jylla, kam ka Meghalaya Residents Safety and Security Act, 2016, ki Entry wa Exit Point, ki aiñ mantre khyndaw wa kiwi ki aiñ wa emkaam wow pynkhlan neibynta wow yada ya ka jaitbru,” da ong u wa yahkhmat ka PDF.
Heijooh i por da ong u wa ki paidbah leh ki toh u em ki ka kitkhlieh yei psiah ki bru wa na baar.
Ha iwi tawon i liang u Hamlet da ong u wa ka NPP kawa kyrchaan lang ya ka sorkar NDA ha Delhi, ka toh wow dam noh ko lada ka sorkar wa yahkhamt da ka BJP u pynman aiñ yabor ko ya ka Citizenship Amendment Bill 2016, kawa da yakhih pyrchah da ki paidbah ha waroh kawi ka thaaiñ mihsngi.
Discussion about this post