U heh ka Liang Pyrchah ha Meghalaya uwa man u MLA ka All India Trinamool Congress (AITC), u Dr. Mukul Sangma da beiñ u ya ka sorkar Meghalaya Democratic Alliance (MDA) wa yahkhmat da ka NPP, heiwa da ong u wa ka sorkar kwah ko wow pynbait ya ki kaam khappood du deiwa pynbor.
Da ong u wa ka sur wa pyrchah ka thai ko, lait noh ki MLA kiwa em ha ka sorkar kiwa pdiang wym kyruiñ dien de, iwa mut wa da sahkut wei chah pyntieñ ha ka Assam, wei u Montri Rangbah ka Meghalaya ym em laad de u wow leh iwon iwon wei i kaamram yong oo toh wow pynka’i bait ya ki MLA kiwa em ha ka sorkar, wei ya ini da leh ha ka Co-ordination Committee yong ka MDA.
Da ong u wa u Montri Rangbah da jop u wow pynsuki ya ki MLA kiwa em ha ka sorkar, hanla waroh 48 ngut ki MLA da ka’i ki, tangwa ki paidbah ka jylla wa ka Liang Pyrchah ym pdiang ki yeini deiwa dawa wa toh u pynbait biang ha i rukom wa tne.
Hajrong i kam u Conrad wa i pynbait pood da leh katkam ki kot ki sla wa da e kti da ka sorkar ha u snem 2011, u Dr. Mukul da kylli u wa lada ha kitæ ki kot ki sla da phah wow phiah mar chiteiñ ki thaw wa ka Assam, yi wa ong ya oo (Conrad) wow phiah mar chiteiñ ya ki thaw.
Puræ leh: Ym em na kiwa em hapoh ka MDA kiwa kwah u pait biang ya ka soskular pynbait pood: Conrad
