U heh ka Congress ha ka jylla uwa man leh u MP ka Lok Sabha na Shillong, u Vincent H Pala da ong wa ka sorkar MDA da pynbaad ko wa ka sorkar wa yahkhmat da ka Congress nachwa da Fail ko, deiwa pynrap wa man i iwa suk wow pynbaad ya iwa da dep iwa pynyoo wa ki kubur ki ya i wym ye ki wei da Fail ki, heiwa da ong u wa kani ka sorkar da pynjoor ki du wow chim ram na kawi cha kawi.
Da ong u wa hei sakhiat i yooluti na kiwa yahkhmat ya ka sorkar MDA toh wow leh rap bha ki, khamtam kiwa boon na ki MLA toh kiwa yut na ka Congress, tangwa kamwa man ym em i leh kamwa yooluti tangwa da boonkaam du wow lute wei wow baamtooh wei ini da pyndiaw i ya ki paidbah.
U Vincent da ong u wa hawa yalap Election kani ka sorkar da klam sarong bha ko i wow leh ko mynried, wei i klam ki heh ka MDA hadooh katni toh ya iwa dadep wa iwa daw wan wei ym klam ki yeiwa katni deiwa pynrap wa ka sorkar MDA ym kam ko wa da Fail ko deiwa kular kulmar donhi ya iwa daw wan.
Da ong u wa kani ka sorkar boonkaam ko du hei wow pynbaad du yeiwa leh da ki sorkar warim, katwa i kaamram yong ki toh wow pynbait yeiwa bakla hawa yoh yei bor.
Chooh chooh da ong u wa ka sorkar synrop MDA nadooh wa sdang da Fail ko ha i rukom krehkaam yong ka la ha i suk i saiñ, i yakhun ya ka khlam COVID-19, ha ka chnat Bordiñ, wow e kaam e jaam neibhah wot ya ki kaam kiwa da chong ngiah, ym em pyndap næ thung de da kiwi.
U MP ka Congress da kam u wa heini i por ki paidbah da silet ki ya kani ka sorkar MDA wei katni da kwah ki wow kyruiñ biang cha ka Congress ha u snem 2023.
