Jowai: U montri rangbah ka jylla, u Conrad K. Sangma ynne da ong u wa ka National People’s Party (NPP) da pyntikna ko wa ka sorkar u man ko ka yong ki paidbah wei yaleh ko wow wanrah kaam pynroi hapoh ka jylla wa salonsar, yeini da ong u ha ka yalang wow pynkup burom ya oo ha ka Nongpyndeng Presbyterian Church kawa em ha Nongstoin, West Khasi Hills.
Da pynksan u wa ka sorkar MDA toh ka sorkar ki paidbah namo “People’s Government,” da ong u neidaw wa man ko neibynta ki paidbah wei em ko ki MLA na kylleiñ ka jylla kiwa pyntip ya kiwa kaam wa emkaam wei kiwa yatoh wa ki paidbah.”
Da kubur u ka West Khasi Hills emkaam ko chiboon ki kaam pynroi khamtam ki sarok, u Conrad da ong u wa ka sorkar thrang ko wow kyntu kynrong ya ka West Khasi Hills wei wow yoh ko ya ki kaam pynroi wa man salonsar kamwa yoh kiwi ki district ka Meghalaya.
Haphrang ki heh niam, ki seiñbhalang, wa ki paidbah wa em ha kani ka yalang, da ong u wa ka sorkar da booh ko chiboon ki kaam pynroi neibynta kani ka District wei iwa kongsan tam toh ki sarok.
“I em i ki MLA na waroh ki District lait na South West Khasi wei ngait skem i wa hadien ka By-election ha Ranikor, daw ye i wow yoh sa uwi u MLA ha ka sorkar MDA, wei wow kreh i neibynta i angnood ki paidbah,” da ong u Conrad.
Ha kani ka sngi da pynkup burom leh ya u symbood montri rangbah, u Prestone Tynsong, u montri ka tnat Industry and Commerce, u Sniawbhalang Dhar wa kiwi ki MLA.
Hadien ini u Conrad wa kiwi ki montri ka sorkar da yachem ki wa kiwa mihkhmat ki seiñ niam wa ki balang kamjooh kiwa yahkhmat ki seiñbhalang heiwa da kular leh wow pait yei eh i khoo wa yachem ki.
Discussion about this post