U Secretary ka seiñ Hill State Peoples’ Democratic Party (HSPDP) u Renikton L Tongkhar, uwa man leh u Montri ha ka sorkar MDA da ong u wa hadooh ynne ka sngi, ka seiñ ym pu yoh ko ya katæ ka chithi na ka seiñ Congress kamwa da klam da uwa yahkhmat ka liang pyrchah u Dr. Mukul Sangma, wei kam ka seiñ ym pu ye ko wow ong iyi iyi.
“Kam kiwa yahkhmat wa ki dkhot ka seiñ i em i i sñiawsih hawa mih iwon iwon i eh wa ktah ya i suk i saaiñ tangwa kam kiwa mihkhmat wei kam ka seiñ kawa em i kitkhlieh neibynta ki paidbah, i kwah i wa waroh u em ki yei ya krehlang neibynta wow wanrah biang ya i chongsuk chongsaaiñ,” da ong u Renikton.
“I em i yei kitkhlieh lang, wei kamtæ ym mut wa lada hun ka sorkar i leh u hunlang tangwa hap i wow pait u bichaar katkam wa chem yong ka HSPDP na ki sorkar kiwa boon, wei kani ka sorkar MDA toh kawa rap em yei kitkhlieh neibynta i chong suk chongsaaiñ wei toh na ini i daw wa da thung da ka takit ‘Judicial Inquiry’ wei da chem leh wa kani ka sorkar toh kawa da chimkhia ya kiwa boon ki kaam bar ya ki sorkar kiwa nachwa,” da ong chooh chooh u.
Da ong u wa ka HSPDP ka pdiang ko ya i takit ‘Judicial Inquiry’ deiwa ong leh wa i thung da kani ka takit man ko wa em i kitkhlieh wow wanrah yei suk wei ini i takit u man ko kawa laitlooid wei kawa daw pynche lut ya kiyi kiyi waroh.
Kam ka Party da pynsñiaw yei sñiawngooh ya ka yung ka sem yong u Cheris kiwa da kyrpaad ya ki paidbah, kiwa chong chnong wow yang ki ya ka Report kani ka takit ka Judicial Inquiry.
