Shillong: U Symbood Montri Rangbah ka jylla, u Prestone Tynsong da ong u wa i chna ya ka High Level Committee (HLC) ym em mut ko wa ka sorkar pyrchang ko wow thied por.
“I chimkhia yow chem noh ya ki laad ki luti ya kani ka kaam kawa da sahteiñ da slem wei wow ye u leh yeiwa kiwi ki sorkar nachwa ymye ki u leh,” da ong u Tynsong ynne ka sngi hadien wa kut ka yalang wa nyngkong High Level Committee.
U Symbood Montri Rangbah uwa man leh kam u Chairman kani ka Committee da ong u wa da phah ki ya waroh ki tnat sorkar kiwa em yatoh waka Sweeper’s Lane wow phah ki ya ki kot ki sla yong ki hapoh chi tayaw.
Ya ini da phah leh ya ka Khasi Autonomous District Council waka Urban Affairs Department wow leh ya ini wei ya ka Law Department wow puræ bniah ko ya ka mukotduma wa yatoh wa kani ka thaw wa em ka Sweeper’s Lane.
“Ka Committee leh daw puræ bniah ko ya waroh ki kot ki sla na waroh ki tnat sorkar yow sñiawthooh che ya kani ka kaam wei manda dep ya ini daw pyntip ko cha ka sorkar yow ye ko u leh yeiwa emkaam waroh ki liang kiwa chah ktah ha kani ka kaam,” da ong u Tynsong.
Hawa kylli ya u Tynsong wa lada ki Sikh wa kreh hapoh ki tnat sorkar jylla kiwa sah ha Sweeper’s Lane toh kiwa sah be-aiñ ha kani ka thaw, u Tynsong da ong u wa ympu ye u ong kat wympu dep u puræ bniah ya ki kot ki sla.
Da ong u leh wa i pyrchang ka sorkar wow kyrriah ya ki Sikh wa em ha kani ka Sweeper’s Lane toh neibynta i bha i miat yong waroh.
“I thmu yong i toh du wow kyrriah donhi ym toh u pyndooh yei hok ki Sikh wei ym kwah de i kam iwa jia katni u jia biang i mynstep mankawi.”
Hawa kylli won yei pyrchah kiwi ki seiñ yong ki Sikh yei wow kyrriah ya kiwa sah ha kani ka thaw, da jubab u deiwa ong wa lada hun namo ym hun ki, ymtoh ki wow kylli hanlada kattæ leh da ong u wa emkaam ka sorkar wow pynkhreh bha deiwa miat neibhah ym dam u mih i pyrchah yeini i kyrriah.
Discussion about this post