Shillong: U dkhot ka National Commission for Minorities (NCM) u Manjit Singh Rai ynne ka sngi da ong u wa ki Punjabi im suk ki hapoh ka sor Shillong wei da im biang ki kamwa jooh im ki du hadien kattu katni sngi donhi.
U Rai ynne ka sngi da yachem u leh wa u Montri Rangbah ka jylla, u Conrad K Sangma uwa da pyntikna ha oo wa ka sorkar da leh ko katwa ye ko yow yada ya ki wei ini waroh i khuslai daw wiar noh i.
U Rai da yachem u leh ya u Chief Secretary ka jylla, u Y Tsering, u State Home Principal Secretary u M S Rao wa ya u Director General of Police u SB Singh yow sñiawthooh yei pynbiang ka sorkar yow wanrah yei suk i saiñ.
“Da dep O wow pait ya waroh wei neiliang i pynkrehkaam ya ka aiñ wow yada kamjooh wow wanrah yei suk toh iwa biang wa leh ka sorkar jylla wei mynstep daw e O ya ka bui (Report) cha ka Commission,” da ong u Rai.
Da ong u leh wa du nei awri wa khian bha wa jia ha Punjabi Lane wei iwa da dep leh u ya maap markylliang da em won kiwa chimkabu wow pynpoor ya ka khubor hamsaya iwa da ktah ya ka chongsuk chongsaiñ.
Hawa kylli ya oo yei dawa wow kyrriah ya ki Sikh cha iwi tawon i thaw da jubab u deiwa ong wa kini ki Sikh da sah ki ha ini i thaw da palat 100 snem wei ymye u man wow kyrriah noh ki cha kawi ka thaw.
U Rai da lai u leh cha Punjabi Lane yow yachem wa ki Sikh ynne ka sngi.
Discussion about this post