U Montri Rangbah ka jylla, u Conrad K Sangma da ong u wa ka sorkar jylla ym jooh pynslem ko wow pynlait ya ka poisa kawa toh ka bhah yong ki District Council lait noh kattæ wa dang sdang u snem mang tangka.
Hawa klam ynne ka sngi, u Conrad da ong u wa katkam wa da yoh lum wei katkam ka bhah wa ki District Council toh u yoh ki, ka sorkar jylla da pynlait bait ko wut wut lait noh i slem wa malu mala, neibhah i kaamram ka sorkar jylla toh wow e kyrchaan ya ki District Council, tangwa ymtoh wow su tulop ya kiwa kreh neibhah ki District Council em ki i yong ki hi i bor.
Ha iwi won i liang da ong u wa i pynslem ya ka samoi krehkaam ki MDC ka KHADC wa JHADC toh neidaw wa ka sorkar ympu yoh ko yaka Report yei pynkhreh yow phiah ya ki chnong wa em ha ki Constituency.
Heiyatoh won wa i pynkylla ya ka Sixth Schedule hapoh ka riti synchaar ka ri, u Conrad da ong u wa ini dang sah ha kti yong ka Home Ministry ka sorkar India wei da pynsñiaw u yei kyrmen wa daw leh ko yeiwa emkaam rap smat yow wanrah yei pynkhreh ha ka dorbar Parliament kawa daw man.
Ha iwi won i liang, u Conrad da ong u wa hadooh katni, da em kamwa 15 tylli ki aiñ (Bill) wa da pynkhreh da ki District Council kiwa dang sahteiñ ha ka sorkar, wei pynrap u wa khnang wow pynsmat yei yoh mynjur ya ki aiñ yong ki District Council, ka sorkar da thung ko da ka Expert Committee kawa pait wei puræ bniah ya ki Bill kiwa da pynkhreh da ki District Council wei hadien wa da mynjur, ka Expert Committee daw phah biang ko cha ka sorkar yow phah pat cha u Lat yow yoh yei mynjur wa smat.
Discussion about this post