Shillong: Chirup wa ka ri waroh kawi, da lehkmen ya ka sngi wa kyrpang kiwa sikai namo ka Teachers’ Day ha U Soso Tham Auditorium, Shillong heiwa u montri ka tnat puræ puthi, u Lahkmen Rymbui da man u kam u kongsan.
Hawa e i klam u Lahkmen da e khublei u ya kiwa sikai deiwa ong wa man ki kiwa e mynsien wei kam ki nongmuna ya ki khynnah wow bood ki deiwa pynrap leh wa katni em chiboon i thrang wei angnood ki manbei manpa na kiwa sikai.
Da ong u wa ka sorkar jylla tip ko yei eh i khoo wa yachem kiwa sikai wei ka sorkar hi yaleh ko wow pyndap pynbiang yeini waroh.
Chooh chooh da ong u wa ka sorkar jylla krehlang ko chirup wa ka sorkar pyrdi wow hikai pynpliah ya kiwa sikai deiwa kyntu ya kiwa sikai wow chim kabu ki ya kini ki jait esikai wa yoh ki kamjooh leh ka sorkar angnood ko wow phah hikai ya ki cha ki National wa International Level.
Heiyatoh wa i rukom man ki paidbah ka jylla kiwa kyruiñ cha ki skur sorkar kam ki laad wa khaddooh wow yoh yei stat i tip ha kylleiñ ka jylla, u montri da ong u wa kini ki skur emkaam ki wow kreh na mynsien wow e yei stat i tip wa paka yow ryngkat wa kiwi ki skur hapoh ka jylla deiwa kyntu ya waroh wow kreh lang wa ka sorkar wow chem yei duna wa em ha ki skur sorkar kamjooh leh da kyntu u ya kiwa sikai wow man ki kiwa yakrehlang wa ka sorkar la ha iwon iwon i bynta.
Ha kani ka sngi da yoh ya ki kyntien lamphang na u Additional Secretary, Education, C P Gotmare, uwa da ong wa ka sorkar chimkhia bha ko heiyatoh wa i eh i khoo wa yachem kiwa sikai kamjooh leh wow pynmiat pynbha ya i rukom hikai ha waroh kawi ka jylla.
U Lahkmen ynne ka sngi da pynkup burom u leh ya ki State Award wa ki Special Awards cha kiwa sikai na ki district waphær waphær ka jylla wei da pynlait u leh ya ka kot Mid Day Meal Handbook.
Da pynphooh ya kani ka sngi da ki chaad wa ki rwai wa da pynkhreh da ki khynnah skur waphær waphær.
Discussion about this post