Shillong: Uwa yahkhmat ka liang pyrchah ha ka yung dorbar chna aiñ ka jylla, u Dr. Mukul Sangma ynne da pynbaad u ya ka sorkar jylla wa jied bru ko hawa pyllat poisa (Bill) yong ki Contractor.
Da ong u wa kiwa dang sdang wot u khih kam ki Contractor da sangeh noh ki neibhah ka poisa wa chim ram ki da sah ko khlem su neibhah ym yoh kreh ki.
Da kam u wa ka sorkar warim wa yahkhmat u da ye ko u pynmih boon ki bru samen wa seiñ khih khamtam ki Contractor, tangwa kini kiwa sdang kreh da sangeh ki neidaw wym skem i rukom su ya ki.
Da kdaw u wa iwa eh dooh toh wa ka sorkar chem chitom ko wow seiñ khih mo u e kreh ya ki.
Chooh chooh da ong u wa ki bru samen wa chlur wow seiñ khih da chah pyndooh mynsien ki neidaw wym biang ka poisa wa yoh ki hawa su yeiwa da kreh ki.
Da ong u leh wa lada pteiñ bait kamni daw pyndooh mynsien i ya kiwa dang sdang wei ini ym man i iwa miat, deiwa pynrap wa heipor ka sorkar yong oo da pyndep ya kiwa boon ki sarok wa kiwi ki jait kreh tangwa ha kani ka sorkar ka International Centre for Performing Arts ha Mawdiangdiang wa ka Medical College ha Tura da sangeh ki.
U Mukul da pynbaad u wa ki Truck wa ki Pick-up kit mooyong ki khlem su dan ya ka sorkar, deiwa kylli leh kammon u yoh poisa ka sorkar wei yeini waroh du kiwa tip.
Da kdaw u leh wa ki wakreh ki District Council kattu da boon bnai ymem yoh tulop ki wei ka poisa wa yoh ka sorkar na ki dan toh u e bhah ya ki Council.
Discussion about this post