Ka sorkar yaroh ko yeiwa leh u Cherishsterfield Thangkiew, dei yooluti wow bood kiwi: Prestone Tynsong

Shillong: Hadien wa embynta wow chna ya ka Hynniewtrep National Liberation Council (HNLC) wei wow ksoh kam u General Secretary ha ka seiñ, u Cherishsterfield Thangkhiew da wan pyndem noh u ynne ka sngi hakhmat ka sorkar jylla.

Ya u Cherishsterfield da pdiang sñiawbha da u Symbood Montri Rangbah ka jylla, u Prestone Tynsong ryngkat i emlang u Director General of Police (DGP), u R.P. Agarwal wa kiwi ki heh pulit ha Headquarter ki pulit ha nongbah Shillong.

U Cherishsterfield da psiah seiñ u heipor wa chna ya ka Hynniewtrep A’chik Liberation Council (HALC) ha u snem 1987 wei da em bynta u ha ki yakhih saiñ pyrthai wei hadien wa pyndam noh ya ka HALC, da em bynta lang u wow chna ya ka Hynniewtrep National Liberation Council (HNLC) ha u snem 1997 heiwa da ksoh u yei kyrdan General Secretary ka HNLC hadooh wa wan pyndem u.

U Cherishsterfield da mih noh u na kani ka jylla nadooh u snem 2004 wow yut cha Bangladesh wei ym em uiñ u cha India hadooh wa wan ekti u pyn da oo ya oo hi ha ki bor ka aiñ.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha ka yalang wa tbian u Prestone Tynsong da ong u wa kani man ko ka sngi wow sahkynmoo heiwa da e khublei u ya waroh kiwa wan yah ya u Cherishster cha ka imlang sahlang.

“Ka sorkar da yaroh ko ya u Cherishster wa da chim u ya kani ka rai wow uiñ noh cha yung hanlada boon snem da wiar u na jylla, wei yooluti i leh wa kiwi leh da booddien ki yeiwa da leh (pyndem) uni uwa yahkhnat warim ka HNLC. Nga kyntu O leh ya kitu kiwa dang em cha baar ri wow bood ki yeiwa leh u Cherishster wei ka sorkar daw pyrchang ko wow yarap ya ki katwa ye,” da ong u Prestone.

Heijooh i por u Prestone da ong u wa ka sorkar daw leh ko yeiwa emkaam, wei da kyntait u wow jubab lada ka sorkar u pynchitom ko ya oo hajrong ki kaam pyrchah aiñ yong oo heipor wa em u wa ka seiñ.

Ha iwi i liang, u DGP u RP Agarwal da pyntip u wa ki pulit daw takit bniah ki ya u Cherishsterfield wow tip bniah yei man i long ka HNLC wa i em dkhot yong ka.

U Cherishsterfield da psiah u chapoh jylla na Bangladesh lyngba ka Dawki samen u wei heipor wa pyndem u ym em rah u kiwon kiwon ki tiar siat næ tiar pynmynsoo.