U Symbood Montri Rangbah ka jylla uwa pait leh ya ka chnat Urban Affairs, u Sniawbhalang Dhar da ong u wa ka sorkar Meghalaya yieñ skem ko wow kyrriah noh ya ki 342 tylli ki manyung ki Harijan na Them Iewmawlong.
Da ong u wa ki kyndon wa da booh da ki Harijan toh ki wym ye u pdiang wei ki wym ye u pynbiang da ka sorkar neibhah da man ki cha wa palat.
Da khana u leh wa ka sorkar da dep ko wow e jubab lyngba ka Affidavit cha ka Meghalaya High Court wa ki Harijan ym pdiang ki yeiwa da tyrwa ka sorkar.
Chooh chooh da ong u wa neidaw wa u Chairman ka High Level Committee (HLC), u Prestone Tyngsong ym em u cheini, kamtæ ka sorkar daw chim ko yei rai ha ka tayaaw wow wan.
Neiliang ka Harijan Panchayat Committee (HPC) da kyntiat ko yeiwa da pynkhreh ka sorkar heiwa da dawa ki 200 Square Metre i thaw ya kawi pa kawi ka manyung deilang waka poisa kawa T. 20 lak kawi ka yung deiwa ong wa i pynkhreh ka sorkar toh i wym biang, i wym man hok wei iwa man pyrchah yei rukom synchaar paidbah.
