May 11, 2023
Ka lympung yalehbol wa tip kam ka Meghalaya State League 2023 u sdang ko mynstep ka 12 tarik ha madan Kiang Nangbah Stadium Jowai heipor 2:00 waje wei daw wan wai yaka da u Montri ka chnat Sports and Youth Affairs ka sorkar jylla, u Shakliar Warjri hei emlang u Wailadmiki Shylla, MLA ka Jowai wa kiwi.
Neiliang u Secretary ka Local Organising Committee, WJDSA, u Lamat Oo Laloo da ong u wa neiliang yong ki hi kam kiwa toh u pait u pynlai ya kani ka lympung hadooh ka 3 tarik u Naiynru 2023, i pynkhreh da man i iwa lai bait lai ryntih wei yooluti ki leh u man i iwa jop.
Da kyntu u leh ya ki liang kiwa daw chimbynta ha kani ka lympung ha madan Kiang Nangbah Stadium wow sñiawbha ki u bood ryntih ya ki kyndon najrong u poi biang por.
Da pyntip haroh u wa ha kani ka sngi daw em leh i pynka-it ka-sar ya ki paidbah dei tem DJ kamjooh i rwai pynchongchit na ka Jessie Lyngdoh.
Neiliang kiwa yahkhmat yong ka Rangdajied United FC lyngba u Captain, u Ñiawkorlang Kyndiah waka 7 Wasa United lyngba u Captain, u Pynishai Lathong da khana ki da yaleh ki katwa ye i bor yow pynkhrehbha ki neibynta u hiar madan mynstep ka sngi.
Heijooh i por kyntu ki ya ki paidbah wow wan sakhi ki ya kani ka lympung nadooh mynstep ka sngi sdang, neibhah ki hi kam kiwa yalehke sñiaw yoh mynsien ki hawa ki paidbah bien ki u e mynsien u kyrchaan.
Ha uni u snem da em 25 tylli ki liang kiwa daw chimbynta heiwa da yabhah ha 4 tylli ki Zone heiwa ha Jowai Zone da em 7 tylli ki liang, ha Mawkyrwat Zone da em 6 tylli, ha Shillong Zone 6 tylli katwa ha Tura Zone da em 6 tylli ki liang.
Ya ka Final won daw pynman ha Shillong.
