Shillong: U montri ka sorkar jylla uwa pait yaka chnat khloo, u Lahkmen Rymbui da ong u wa ka sorkar ym ke wow khang ya ki Company wow krehkaam lada ye ki wow bood ya ki kyndon wa da booh da ka sorkar. Ya ini, u montri da ong u hawa kylli hajrong i pyrchah kiwa chong chnong ya i thmu yong ka Star Cement wow pynheh yaka paar tih moochuni ha ka thaaiñ Narpuh, East Jaintia Hills.
Hawa yaklam wa ki kattu katni ngut kiwa thoh khubor, u Lahkmen da ong u wow pynchitom lada em iwon iwon i eh hawa yatoh wa ka mariang, ka sorkar India da booh ko da ka Policy wa kiwon kiwon ki kreh kiwa heh emkaam wow pynman chwa yaka Public Hearing yow tip yei sñiaw ki paidbah.
Hawa yatoh wa i pyrchah lada tih ya u moochuni ha Brichyrnot wa lada daw ktah ko leh yaka thaw wa pynneh pynsah ya ki mrad khloo wa ki jait thung wa da jan dooh jait ha ka Narpuh Wildlife Sanctuary neidaw wa ka thaw wa thmu wow tih moochuni heh ko hadooh 42.051 Hectare, u montri da ong u wa ka Narpuh Reserve Forest ka em ko ka yong ka hi ka Eco Sensitive Zone. Wei lada i tih moo hapoh ka thaw wa da mang kyrpang ym ye u tih, katwa cha palat won yong katai ka thaw ym em eh wow tih moo.
Da ong u wa lada i thmu wow tih ya u moo man ko hapoh ka Eco Sensitive Zone, ka sorkar jylla ym e laad ko, tangwa lada man ko cha palat katai ka thaw ka sorkar leh ym ye ko wow leh iyi iyi leh.
Discussion about this post